17-19 Fevralda Müstəqil “M.Teatr”ın (“Mənim teatrım”) səhnəsində müasir gürcü yazarı Gela Dumbadzenin "Gecə qonağı"əsəri əsasında hazırlanmış "Məhşər günü" tamaşasının premyerası olub.

Kulis.az xəbər verir ki, xalq artisti Vidadi Həsənovun səhnələşdirdiyi yeni tamaşanın quruluşçu rejissoru Gümrah Ömər, quruluşçu rəssamı Umay Həsənova, musiqi tərtibatçısı Amid Qasımov, xoreoqrafı isə Oksana Rəsulovadı.

Səhnə əsərində rolları xalq artisti Vidadi Həsənov , gənc aktyorlar Şahanə Yusifova , Tohid Əzim ifa ediblər.

Bir bölümlü əcəl oyunu kimi hazırlanan “Məhşər günü” tamaşası uğurlu karyera qurmuş, bu yolda bir sıra mənəvi dəyərlərini itirmiş və ölümə məhkum edilmiş, istedadlı, təcrübəli dövlət müşavirindən bəhs edir. O, hər şeydən bezir, gərəksiz biri olduğunu anlayır və özünü öldürmək qərarına gəlir. Odur ki, tapança ilə rus ruletkasını vasitə seçərək həyatı ilə oyuna başlayır. Hər cəhdində gülləyə tuş gəlməyən qəhrəman itirdiyi sevgilisini, ustadını, dostunu xatırlayıb onlara layiq olmadığını anlayır və israrla amansız oyununa davam edir. Bir sözlə, içində kök salmış laqeydliyi, təkəbbürü, xudbinliyi tədricən məhv edib əvəzində sevgi, savab kimi mənəvi keyfiyyətləri dirçəltməyi bacarır. Nəhayət, anlayır ki, bu mənəvi keyfiyyətlər insan həyatında əvəzi olmayan dəyərlər və həqiqətlərdir.

Premyeradan sonra tamaşaçılar yaradıcı heyətlə səhnəarxası görüş keçirib, onlarla xoş təəssüratlarını bölüşüblər.

• Nəsiminin Suriyadakı məzarı Azərbaycana gətirilə bilər
• Məşhur opera yeni quruluşda: səhnəyə 4 Leyli, 4 Məcnun çıxacaq
• Vüqar Tapdıqlı: "Ən çox ona təəssüf edirəm ki, canlı əfsanələr ekrana köçürülmür..." - Memuar müsahibə