Türkiyənin məşhur aktyor və stəndapçısı Cem Yılmaz ötən gün Bakı Konqres Mərkəzində “Diamond Elite Platinum Plus” “satnd up” şousu ilə çıxış edib. Bilet qiymətləri və konsertin gedişatı yerli komediya ustaları tərəfindən birmənalı qarşılanmayıb.

Kulis.az Cem Yılmazın stəndap şousu barədə aktyor, stəndapçı Elməddin Cəfərovun fikirlərini öyrənib.

“Biletlərin satışı barədə heç nə deyə bilmərəm. Onun özünə verdiyi dəyər budur. Əgər zal tam dolursa, deməli, onun üçün normal qiymət odur. Konsertinə də getdim. Cem Yılmaz peşəkardır, halal olsun. Biletlərin qiymətlərinə də sayğı ilə yanaşıram. Əgər yeddi yüz manat bilet satışı ilə də zal dolursa, adam niyə qiymətini ucuz etsin ki? Biz özümüz iyirmi manat qiymət qoyanda düşünürük ki, çox bahadır. Amma adam biletini yeddi yüz manat qiymətə qoyur və zalda əyləşməyə yer yox idi. Ən xoşuma gələn tərəfi isə peşəkarlığı oldu. Türk xalq musiqisi üzərindən öz mədəniyyətlərinə aid bir səhnəcik hazırlamışdı və hamı da gülürdü. Deməli mədəniyyətin dilindən, irqindən asılı olmayaraq hər millətin öz səhnəsini yaratmaq mümkündür”.

Elməddin Cəfərov həmkarı Fərda Xudaverdiyevin konsertlə bağlı açıqlamasına da münasibət bildirib:

“Fərdanın bizim uduzmağımızla bağlı verdiyi açıqlamaya isə münasibətim belədir. Görünür onu konsertə dəvət etməyiblər, açığı heç məni də təşkilatçılar dəvət etməmişdilər. Bir dostumun iki bileti vardı, onunla getdim. Düşünürəm ki, Fərdanın ironiyası təşkilatçılarımızla bağlıdır”

Elməddin Cəfərov Cem Yılmazın bizim komediya ustalarından daha intellektual olması iddiasını belə cavablayıb:

“Konsertdə intellektuallıq yox idi. Çoxlu söyüş vardı. Əgər söyüş intellektuallıqdırsa, Cem çox intellektualdır. Vallah, elə şeylərdən danışdı ki, mən şəxsən bu barədə oğlanlarla, yaxın dostlarla danışa bilərəm. O da ailə ortamından uzaqda. Yenə deyirəm, Cem peşəkardır, amma ona intellektual deməyək”.

• Denni DeVito "Əkizlər"in davamından niyə imtina etdiyini açıqladı
• Tarixi Vilyena xəzinəsi qarət edildi
• Tanınmış feminist yazıçı vəfat etdi