Amerikalı məşhur repçi və dizayner Kanye Vest ad gününün qeyd edilməsinə 400 min dollar xərcləyib.
Kulis.az xəbər verir ki, bu barədə ABŞ-nin populyar "TMZ" nəşri məlumat yayıb.
İyunun 8-də 49 yaşı tamam olan sənətçinin əsas ad günü şənliyi iyunun 28-də Fransadakı məşhur tarixi Versal sarayı kompleksində baş tutub. Qapalı maskarad formatında keçirilən dəbdəbəli gecədə sənətçinin ən yaxın dostları iştirak edib.
Cəsur geyimlər və qəribə obrazlar
Həmin gün Kanye Vestin həyat yoldaşı, qalmaqallı geyimləri ilə daim gündəmdə olan model Byanka Senzori yenə də ənənəsinə sadiq qalıb.
O, məclisdə olduqca cəsarətli, dərin dekoltesi olan dəri rəngli atlaz korsetlə diqqət çəkib. Model öz obrazını eyni rəngli hündür platforma ayaqqabılar, üzük və lələkli baş geyimi ilə tamamlayıb. O, stulda əyləşən repçinin yanında poza verərkən kameraların hədəfinə tuş gəlib. Gecənin səbəbkarı Kanyenin özü isə qara dəri kostyumda və üzünü tamamilə örtən maskada olub.
Keçmişin qara kölgəsi: Muzeydən sərt imtina
Məclisin dəbdəbəsinə baxmayaraq, sənətçinin ictimai rəydəki problemləri davam edir. Belə ki, bu ay Amsterdamdakı Milli Holokost Muzeyi Kanye Vesti qəbul etməkdən qəti şəkildə imtina edib.
Muzey rəhbərliyi bəyan edib ki, onlar sənətçinin əvvəllər səsləndirdiyi antisemit bəyanatları ilə korlanmış imicini təmizləmək və yaxşılaşdırmaq üçün bir platforma rolunu oynamaq istəmirlər.
Xatırladaq ki, repçi fəaliyyəti ərzində dəfələrlə antisemit fikirlər səsləndirib və nasizmi tərifləyən çıxışlar edib.
