"Uniq İstanbul"da rejissoru Çağan Irmak olan, BKM-in istehsalı “Adile” filminin qalası keçirilib.
Kulis.az xəbər verir ki, filmin baş rol ifaçısı Meltem Kaptan jurnalistlərlə söhbətində rol təklifini eşidən kimi imtina etməyin qeyri-mümkün olduğunu deyib:
“Çox böyük məsuliyyət hiss etdim. Hər şeyi bir kənara qoyub yalnız buna hazırlaşmalıydım.”
Filmdə Müjdə Arı canlandıran Seda Bakan isə layihənin onu sözün əsl mənasında "Yeşilçam"a “apardığını” deyib:
“Əgər həyatda bir arzum olsaydı, "Yeşilçam" dövrünə getmək olardı. Bu film sayəsində o dövrün içinə düşdüm. Ssenarisi həm çox gözəl, həm çox təsirli idi.”
Münir Özkulu canlandıran Levent Can rolu qəbul edərkən yaşadığı qorxunu gizlətməyib:
“Əvvəlcə çox çəkinirdim. Çünki Münir bəy kimi nəhəng bir insanı canlandırmaq asan deyil. Ancaq Çağan Irmağın izahları, istiqaməti məni tamamilə sakitləşdirdi.”
Filmin ssenari müəllifi Nermin Yıldırım isə layihəyə “adi bir ssenari” kimi baxa bilmədiyini bildirib:
“Mən də çoxu kimi onun filmləri ilə böyümüşəm. Uşaqlıqda ‘Uykudan Önce’ proqramında adımın çəkilməsini gözləyənlərdən olmuşam".
Ssenarist komandanın bütün üzvlərinin eyni həssaslıqda çalışdığını əlavə edib:
“Hamımız bir şeyi düşünürdük: Əlimizdən gələnin ən yaxşısını edək və Adile Naşitə layiq olaq. Ona qarşı məsuliyyət hissi daim bizimlə idi.”
