Kulis.az "Hekayə müzakirəsi" layihəsindən Həmid Piriyevin "Hərami Əhmədin dastanı" adlı hekayəsi haqqında yazıçıların fikirlərini təqdim edir.

Mirmehdi Ağaoğlu: "Həmid Piriyevin “Harami Əhmədin dastanı” adlı yeni hekayəsi məlum poemanın dekonstruksiyasıdır, Həmidin bundan əvvəlki “Neft və milyonlar səltənətinin faytonçusu” adlı hekayəsi də ənənəvi mövzularından fərqli olaraq müəyyən mənada “tarixi” adlandıra biləcəyimiz mövzuda idi. Bu, yaxşı haldır. Görünür, Həmid hekayə yaradıcılığında yeni mərhələyə keçir. Bu hekayədə isə mənim xoşuma gələn dediyim kimi poemanın dekonstruksiyası və müəllifin alternativ süjetlər təqdim edərək oxucunu çaşdırması oldu. Alternativ süjetlər isə hekayəyə detektivlik ovqatı qazandıraraq belə sual yaradır ki, həqiqətən hərami Əhməd kim idi? Nağılçının danışdığı təxəyyül obrazımı, yoxsa, Mustafa ilə üzbəüz oturub şərab içən səyyahmı?".

Orxan Cuvarlı: "Həmid Piriyevin "Hərami Əhmədin dastanı" hekayəsini zövqlə oxudum. Mütaliə boyunca Ənvər Məmmədxanlının "Karvan dayandı" əsərini xatırladım. Son dövrlərdə ədəbiyyatımızda nağıl, dastan formalı hekayələrə qayıdış təmayülü görürük. Yaxın keçmişdə Mübariz Örənin "Yaxşı padşahın nağılı" hekayəsini də buna misal göstərə bilərik. Həmidin hekayəsini isə xeyli bəyəndim. Həmid Piriyev mənim ürəyimə, hisslərimə yaxın müəllifdir. Onun həyatın adi ritmi üzərində qurulan hekayələri həmişə içimi duruldub, məni fərəhləndirib. Piriyev son iki hekayəsində ("Neft və milyonlar səltənətinin faytonçusu" və bu hekayə) tamam fərqli ampluada qarşımıza çıxır. Görünür, istedadlı qələm dostumuz yeni axtarışlardadır. Təbrik edirəm və uğurlar arzulayıram".

Rəvan Cavid: "Sehrli idi. Misir bazarlarında çəkilmiş Hollivud filmlərini xatırlatdı. Mistik, mifik sərgüzəştlərin yeyin dillə ifadəsi ləzzət elədi. Məncə, nağıl, dastan motivlərinin yenidən işlənməsinə, təhkiyəsinin nəsr dilinə çevrilməsinə ehtiyac var. Həmid bu işin startını verib. Qalıb davam etdirmək".

Orxan Həsəni: "Həmid Piriyev müasir Azərbaycan ədəbiyyatında ən sevdiyim hekayəçilərdən biridir. Onun sakit, təntənəsiz, həyatın qırışlarında gəzişən hekayələrini maraqla oxuyuram. Müzakirə gedən hekayə isə, məncə, onun ən uğurlu hekayəsidir. Bu mətnə görə sevindim".

• Həyat yoldaşı Andre Jidin gizli meyillərini öyrənəndə nə etmişdi?
• Azərbaycan əsgəri ağlaya bilərmi? - Hamını qəzəbləndirən "Kuklalar"
• “Kurtlar vadisi”nin məşhur aktyoru xəstəxanaya yerləşdirildi