Mətləb Ağanın “11-ə qədər” şeirlər kitabının təqdimatı keçirilib. “APA Holdinq”də keçirilən təqdimat mərasimində “APA Holdinq”in prezidenti Vüsalə Mahirqızı, şairin qələm dostları Səhər Əhməd, Qurban Yaquboğlu, Əkbər Qoşalı, Qan Turalı, Mahir Mehdi, Həyat Şəmi və başqaları iştirak edib. Kulis.Az-ın verdiyi xəbərdə belə deyilir.

Tədbiri giriş sözü ilə açan tənqidçi Əsəd Cahangir Mətləb Ağanın yaradıcılığından danışaraq onun öz nəsildaşları arasında özünəməxsus yer tutduğunu bildirib: “Mən Mətləbin yaradıcılığı ilə çoxdan tanış olsam da yaxından tanımırdım. Mən hətta elə bilirdim ki, Mətləb Ağa yaşlı adamdır. Bu təqdimatda ilk dəfə onu yaxından görmək mənə qismət oldu”.

Şairə Səhər Əhməd Mətləb Ağayla 90-cı illərdə ədəbiyyata gəldiyini xatırlatdı: “Biz Mətləblə eyni dövrdə ədəbiyyata gəlmişik. Həmin dövrdə ədəbiyyatda öz sözünü demək çox çətin idi. Mətləb o vaxt ədəbi mühitdən gedəndə demişdi ki, gedişim səssiz olsa da, qayıdışım möhtəşəm olacaq. Mən bu gün həqiqətən çox sevinirəm ki, Mətləb qayıtdı”.

“APA Holdinq”-in prezidenti Vüsalə Mahirqızı Mətləb Ağanın şeirlərini daha çox Kulis.Az saytında oxuduğunu tədbir iştirakçılarının diqqətinə çatdırdı: “Mətləb Ağanın Kulisdə indiyə kimi çap olunmuş bütün şeirləri ilə tanışam. “11-ə qədər” şeirlər kitabında çox gözəl şeirlər toplanıb”.

Daha sonra “11-ə qədər” şeirlər kitabının redaktoru Namiq Hacıheydərli, şair Qurban Yaquboğlu, Həyat Şəmi və başqaları Mətləb Ağanın yaradıcılığından danışıblar.

Tədbirdə “11-ə qədər” şeirlər kitabından şeirlər də oxunub.

Sonda çıxış edən Mətləb Ağa tədbir iştirakçılarına minnətdarlığını çatdırıb.

“11-ə qədər” şeirlər kitabı “Qanun” nəşriyyatında 500 tirajla çap olunub.

“11-ə qədər...” şairin ilk kitabıdır.

Kitabda Mətləb Ağanın gənclik illərindən bu tərəfə yazdığı şeirlər toplanıb.

• Azərbaycanın milli-mədəni irsi Norveç festivallarında
• Alter-eqosu haqqında əsərləri ilə məşhurlaşan yazıçı - Markes yaxın dostu Alvaro Mutisi necə adlandırmışdı?
• Tramp səmimiyyətsizlikdə günahlandırıldı – Məşhur müğənniyə görə