Təbiətin ən gözəl rənglərinin bir-biri ilə ahəngdə olduğu Azərbaycanın ən əsas turizm regionlarından biri olan Qəbələ şəhəri hər il olduğu kimi bu il də klassik musiqi sevənləri qarşılamağa hazırlaşır.

29 iyul - 03 avqust tarixində Qəbələ konqres mərkəzində Qəbələ Musiqi Festivalı çərçivəsində bir çox ölkələrin kamera və klassik orkestrlərinin çıxışı baş tutacaq. 6 gün davam edəcək musiqi bayramı çərçivəsində hər gün Üzeyir Hacıbəyli adına Bakı Musiqi Akademiyasının kamera orkestri, Azərbaycan Dövlət Akademik Opera və Balet Teatrının simfonik orkestri, İngiltərənin Femusa kamera orkestri və digər qrupların çıxışları baş tutacaq.

Festival boyunca respublikanın ən mühüm sənətkarları Fərhad Bədəlbəyli, Murad Adıgözəlzadə, Azər Rzazadə, İsfar Sarabski və digərləri ilə yanaşı, Janna Qandelman (İsrail), Mixael Sladkin (ABŞ), Dmitri Yablonski (ABŞ), Canluicci Sartori (İtaliya), Mojca Zlobko Vaygl (Sloveniya), Nomeda Kazlaus (Litva) və digər ölkələrin tanınmış musiqiçilərinin çıxışları klassik musiqi sevənlər üçün əsl bayram təntənəsi yaşadacaq.

Dünyaca məşhur musiqiçilər Fərhad Bədəlbəyli və Dmitri Yablonskinin bədii rəhbərliyi ilə hazırlanmış musiqi proqramı bütün musiqisevərlərin könlünü oxşayacaq. Festivalın həyata keçməsinə birbaşa dəstəyi Mədəniyyət və Turizm Nazirliyi, Heydər Əliyev Fondu, Üzeyir Hacıbəyli adına Bakı Musiqi Akademiyasının kamera orkestri və "Gilan Holding" göstərir. Festivalın ümumi hissəsi Heydər Əliyev adına Qəbələ Konqres Mərkəzində, açıq səma altında keçiriləcək və Qafqaz dağlarına açılan ən gözəl mənzərə ilə açıq səma altında konsert proqramı musiqi bayramına daha da rəngarənglik qatacaq.

- Qəbələ Musiqi Festivalı Haqqında -

2009-cu ildən başlayaraq hər il yay aylarında (iyul-avqust) Qəbələ şəhəri beynəlxalq musiqi festivalına ev sahibliyi edir. Bu il sayca 9-cu olun bu festival əsasən klassik musiqi sevənlər üçün nəzərdə tutulub. Bununla yanaşı, konsert proqramına muğam və caz ifaçıları da öz töhfələrini verirlər. Festivalın Qəbələ şəhərində keçirilməsinə baxmayaraq, festival çərçivəsində Qax və Şəki şəhərlərində də musiqi proqramı həyata keçirilir.

Daha ətraflı məlumat üçün: (+99450) 290-05-20

www.gabalamusicfestival.com

www.qafqazhotels.com

• "İlıq bir su kimidir içimdə yalnızlığım..." - Fazil Hüsnü Dağlarca
• Aziz Sancar “Şöhrət” ordeni ilə təltif edildi - SƏRƏNCAM
• Dünya Köçəri Oyunları başa çatdı