Bu gün tanınmış şair Salam Sarvanın doğum günüdür.
Kulis.az Nadir Yalçının yeni "Salam Sarvanın barelyefi" şeirini təqdim edir.
Heç nəyin üzünə,
heç ölüm sözünə
nə özündən yuxarı göy üzünə,
nə özündən aşağı Allahın qara gözünə
bağlanır qapın,
nə də ağlamsınır bənizin,
dalğasıyla əlbəyaxa dənizin
qoynunda ağzıgünə yelkənli sal kimi,
atların ayağında laxlayan nal kimi,
zəhər kimi, ya bal kimi,
hər necəsə,
bağlanmır qapın heç kimə, heç nəyə,
"sağ ol" deməyə dilin gəlmir, hər şeyə mərhəba, salam.
Dəyişir, şəkillərdən bilirəm, səsindən eşidirəm,
dəyişir qamətin, tinin dəyişir,
dəyişir rəngin, cildin dəyişir,
gözlərin, gözlərin,
elə yaxşıdır, nə dəyişir, nə yumulur, nə itir,
adamı didir gözlərin, adamı incidir.
adamı dirildir sözlərin, canımı dirildir,
özünü dirildir nəyin bəs, özün necəsən?
"sağ ol" deməyə dilin gəlmir, hər şeyə mərhəba, salam.
rayon uşaqlarını sudan çıxan balıq kimi atırlar hərdən mikrorayonlara,
bu balaca rayonlara, bu dar rayonlara,
bu tilov rayonlara, bu tor rayonlara atırlar hərdən
rayon uşaqlarını.
çabalaya-çabalaya yaşayırlar
malalaya-malalaya yaşayırlar mikrorayonlarda rayon uşaqları.
ağlaya-ağlaya yaşayırlar,
imama ağlayanda da özlərinə ağlayırlar rayon uşaqları.
bu balaca küçələrə necə sığışırsan,
danışa-danışa, yeriyə-yeriyə yekələn, yekələn
hərdən dəniz kimi sahilindən çəkilən.
barelyefin çox sinəyə vurulur -
deyiləcək, bax, burda, bu ürəkdə,
bu sinədə, bu döyənəkdə yaşayır,
səni balaca rayonlardan
o xatirə lövhələri,
ürək lövhələri çıxarır.
adamı didir gözlərin, adamı incidir.
adamı dirildir sözlərin, canımı dirildir,
özünü dirildir nəyin bəs, özün necəsən?
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər