Mədəni Əlaqələrin İnkişafına Dəstək (MƏİDİB) İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının və Beynəlxalq Münasibətlərin Təhlili Mərkəzinin maliyə dəstəyilə “Azərbaycan musiqisinə qarşı aparılan işğalçılıq siyasətinə dair” beynəlxalq konfrans-konsert layihəsinin icrasına başlayır.

Kulis.az xəbər verir ki, İctimai Birliyin sədri, layihə rəhbəri İlahə İsrafilovanın verdiyi məlumata görə, layihənin hazırlıq işləri ilə bağlı işçi heyətinin bir sıra iclas və müzakirələri artıq baş tutub.

"İllərdir, Azərbaycanın ən səfalı guşələrinə göz dikmiş mənfur düşmənlərimiz zaman-zaman xalqımızın zəngin mədəniyyət sahəsi olan musiqimizə də göz dikmişlər. Mahnılarımızın erməni xalq musiqisi adı altında təqdim olunması Azərbaycan ictimaiyyətini, xüsusilə mədəniyyət sahəsində fəaliyyət göstərən ictimai xadimlərimizi ciddi şəkildə narahat edir. Məhz sözügedən layihənin əsas məqsədi də Ermənistanın Azərbaycan musiqi mədəniyyətinə qarşı olan təcavüzünə səs qaldırmaq, bu mövzunu bir daha peşəkarların dilindən ictimailəşdirərək beynəlxalq aləmin diqqətini bu önəmli mövzuya yönəltməkdir”-deyə adıçəkilən İctimai Birliyin məlumatında bildirilir.

Qeyd olunur ki, toplantıda mövzu haqqında ətraflı müzkirələrlə paralel ermənilər tərəfindən oğurlanmış musiqi parçaları da ifa olunacaq.

Layihənin ərsəyə gəlməsində Üzeyir Hacıbəyli adına Bakı Musiqi Akademiyasının “Şifahi ənənəli Azərbaycan professional musiqisi və onun yeni istiqamətlərinin tədqiqi: Orqanoloqiya və Akustika” elmi tədqiqat laboratoriyasının alim heyəti, elm və musiqi xadimləri, tanınmış musiqişünaslar yaxından iştirak edir.

Tədbirin 6 noyabr 2020-ci il tarixində, ZOOM proqramı vasitəsi ilə keçirilməsi planlaşdırılır. Xaricdən dəvət edilmiş qonaqların layihədə iştirakını nəzərə alaraq görüş Bakı vaxtı ilə saat 21:00 təyin edilib.

• Bizim dost itirən vaxtımız deyil... - Hafiz Baxış
• Azərbaycanda Bilik Günü qeyd olunur
• Yağmursuz havalar - Saday Budaqlının hekayəsi