İngilisdilli qeyri-bədii ədəbiyyat dünyasının ən nüfuzlu mükafatlarından sayılan "Baillie Gifford" mükafatının 2026-cı il üçün 6 kitablıq qısa siyahısı açıqlanıb.

Kulis.az xəbər verir ki, builki siyahı ədəbi bioqrafiya, qədim tarix, sənədli kriminal və beynəlxalq reportaj kimi geniş spektrli janrları əhatə edir.

Seçilən əsərlərin qəhrəmanları arasında Ceyms Boldvin, Barbara Kartland və Makedoniyalı İsgəndər kimi nəhəng tarixi və mədəni fiqurlar yer alır.

Diqqətçəkən məqamlardan biri 2021-ci ildə "Ağrı imperiyası" (Empire of Pain) kitabı ilə bu mükafatı qazanmış amerikalı yazar Patrik Radden Kifin yenidən siyahıya daxil olmasıdır. Müəllif bu dəfə Londonun kriminal dünyasından bəhs edən "Londonun süqutu" (London Falling) əsəri ilə mübarizə aparır. Kitab özünü varlı rus oliqarxının oğlu kimi qələmə verən və Londonun lüks mənzillərinin birindən yıxılaraq sirli şəkildə ölən britaniyalı yeniyetmə Zak Brettlerin hekayəsini araşdırır.

Tarixi şəxsiyyətlər və müasir böhranlar

Kif ilə yanaşı, siyahıda daha beş iddialı yazar 50 000 funt-sterlinqlik baş mükafat uğrunda yarışır:

Andrea Vulf: 18-ci əsrdə Kapitan Kukun ikinci dünya səyahətinə gənc yaşlarında qoşulmuş təbiətşünas və kəşfiyyatçı Corc Forsterin həyatını izləyən "Səyyah" (The Traveller) kitabı ilə diqqət çəkir.

Metyu Svit: O, "Böyük Diktator" (The Great Dictator) əsərində katibələrinə şifahi şəkildə (diktə edərək) yazdırdığı 723 romanla tanınan eşq romanları kraliçası Barbara Kartlandın həyatını və dövrünün dəyişən sosial-cinsi siyasətini tədqiq edir.

Edmund Riçardson: Makedoniyalı İsgəndərin həyatını yeni prizmadan işıqlandıran "Aleksandr" (Alexander) kitabı ilə siyahıdadır.

Nikolas Boqqs: O, qələmə aldığı "Boldvin" (Baldwin) adlı irihəcmli əsərdə məşhur yazıçı Ceyms Boldvinin yaradıcılığına təsir edən dostluq və eşq münasibətlərini yenidən səhnələşdirir.

Anand Qopal: Siyahının sonuncu kitabı olan "Sevgi və qəzəb günləri" (Days of Love and Rage) Suriya vətəndaş müharibəsinin dəhşətlərini ölkənin şimalındakı Mənbic şəhəri sakinlərinin şəxsi təcrübələri vasitəsilə oxucuya çatdırır.

Qeyd edək ki, qısa siyahı 1 noyabr 2025 – 31 oktyabr 2026-cı il aralığında nəşr olunmuş 350-dən çox müraciət arasından seçilən 13 kitablıq uzun siyahıdan seçilib.

Münsiflər heyətinin sədri Kirsti Lanqın sözlərinə görə, bu siyahıda hər kəs üçün nəsə var:

"Bu, münaqişələrlə, eləcə də ümidlərlə dolu bir dünyada öz yolunu tapmağa çalışan insanların hekayələrini birləşdirən eklektik bir siyahıdır. Çoxumuzun bu mürəkkəb və qorxuducu dünyanı anlamağa çalışdığı bir vaxtda, qeyri-bədii ədəbiyyat bizə yolumuzu tapmağa kömək edə bilər."

Xatırladaq ki, builki münsiflər heyətində dünyaca məşhur yazıçı Elif Şafak, "Waterstones" şəbəkəsinin nümayəndəsi Bi Karvalyo, mədəniyyət tarixçisi Tiffani Cenkins və redaktorlar Sem Leyt ilə Ravi Mettu da yer alır. Qalibin adı noyabrın 4-də açıqlanacaq.

"Baillie Gifford" mükafatı haqqında

"Baillie Gifford" (əvvəlki adı ilə Samuel Johnson Prize) 1999-cu ildən bəri ingilis dilində yazılmış ən yaxşı qeyri-bədii kitablara verilən prestijli beynəlxalq mükafatdır. O, təkcə tarixi və bioqrafik deyil, həm də sənədli, siyasi və elmi araşdırmaları əhatə edir. 2016-cı ildən etibarən eyniadlı investisiya şirkəti tərəfindən maliyyələşdirilən mükafat son dövrlərdə bəzi siyasi qalmaqallarla da üzləşib. Belə ki, şirkətin qazıntı yanacaqlarına (fossil fuels) və İsraillə əlaqəli müəssisələrə sərmayə yatırması səbəbindən 2024-cü ildə "Fossil Free Books" fəalları tərəfindən bu sponsorluqdakı ədəbi festivallara boykot kampaniyaları təşkil edilmişdi. Ötən il isə bu mükafatı avstraliyalı yazıçı Helen Qarner "Bir hekayəni necə bitirməli" (How to End a Story) adlı gündəliklər toplusu ilə qazanmışdı.

Ülvi Bahadır

• Qızı niyə Yaşar Nurinin məzarını ziyarət etmirdi? - Xalq artisti haqqında bilinməyənlər
• "Məni diri bilib gözləyir anam..." - Ülvi Bünyadzadə
• Akademik Musiqili Teatrda Anım Günü ilə əlaqədar "Bir nəfəs qədər" tamaşası