Süni intellektin kinonun gələcəyini dəyişdirəcəyi barədə müzakirələr davam etdiyi vaxt Çində maraqlı bir hadisə baş verib.
Kulis.az xəbər verir ki, ölkənin ilk tamamilə süni intellekt vasitəsilə yaradılmış uzunmetrajlı filmi "Sanxingdui: Future Past" gözlənilən kommersiya uğurunu qazana bilməyib.
Film Çində nümayişə çıxarıldıqdan sonra cəmi 1,7 milyon yuan gəlir əldə edib. Bu məbləğ təxminən 191 min funt sterlinq təşkil edir. Halbuki layihənin istehsalına on milyonlarla yuan xərcləndiyi bildirilir.
Film qədim Sanşindui sivilizasiyasını futuristik dünyanın təsvirləri ilə birləşdirən fantastik süjet üzərində qurulub. Ekran işində süni intellekt yalnız ayrı-ayrı kadrların hazırlanmasında deyil, vizual dünyanın qurulmasında da əsas vasitə kimi istifadə olunub.
Maraqlıdır ki, filmin uğursuzluğu süni intellekt texnologiyasının imkanları ilə bağlı mübahisələri daha da gücləndirib. Bir tərəf bu texnologiyanın çəkiliş xərclərini azaltmaqla kinoda yeni imkanlar yaradacağını düşünür. Digər tərəf isə tamaşaçının yalnız texniki yeniliyə deyil, insan təcrübəsindən doğan hekayələrə, inandırıcı obrazlara və emosional bağa ehtiyac duyduğunu vurğulayır.
Beləliklə, böyük texnoloji imkanlar özlüyündə uğurlu film yaratmağa kifayət etməyib. Çin təcrübəsi göstərir ki, tamaşaçının qarşısına yeni texnologiya ilə çıxmaq başqa, onu maraqlı hekayəyə inandırmaq tamam başqa məsələdir.
Ana səhifə
Reels
Yazarlar
Xəbərlər