Kulis.az yazıçılarla bağlı eksklüziv lətifləri təqdim edir.
Fərid Hüseyn küçədə Qisməti dilxor görüb soruşur:
- Nə olub?
- Heç...
- Şeirlərini pisləyiblər?
- Yox...
- Pulun qurtarıb?
- Yox, varımdı...
- Haransa ağrıyır?
- Yox, lap sağlamam.
- Evdə problem var?
- Yox, hər şey qaydasındadır.
- Bəs nə olub? Lap ürəyimi üzdün.
- Görmürsən, deyirlər, Pamuk Nobeli siyasi söhbətlərə görə alıb.
***
Şəhriyar del Gerani topdansatış mağazaya girib, bir “kletka” (12 dənə) araq sifariş edir. Satıcı irişir:
- Keçmisən 3 bəndlik şeirə?
- Bu nə deməkdi? – Şəhriyar təəccüblənir...
- Müsahibədə demiyibsən, hər misranı bir şüşə araqla qeyd eləyirəm?
***
Kənan Hacı şahid kimi məhkəməyə çağırılır. Zərərçəkən danışır, Kənan deyir, siz düz deyirsiz. Müttəhim sözə başlayır, Kənan ona da deyir: “Bəli, tamamilə haqlısız!”
Hakim dözmür:
- Siz eyni vaxtda hər iki tərəfi müdafiə edib deyirsiz ki, düz deyirlər... Belə olmaz axı.
Kənan gülümsəyir:
- Siz də düz deyirsiniz.
***
Bir dəfə Şərif Ağayarla Aqşin Yenisey kafelərin birində yeyib-içirmişlər. Kafeyə çiynisazlı bir aşıq girir, ora-bura baxır və arağın təsirindən gərilib iki özü boyda olan Şərifi tanıyır. Yaxınlaşıb onunla əl görüşür, hal-əhval tutur, sonra əyilib kasada pətənə ilə qurdalanan Aqşinin üzündən öpür və deyir:
- Allah saxlasın!
***
Redaksiyada mübahisə gedir. Aqşin Yenisey:
- Yazıçının ya gərək zəngin genetikası olsun, ya da o, mütləq uşaqlığında at minməlidir.
Mirmehdi Ağaoğlu etiraz edir:
- Tural ki, at minməyib.
Ağa Cəfərli:
- Niyə minməyib, bir dəfə mənim yanımda poniyə mindi.
Aqşin Yenisey:
- Yazıq poninin olanı budu də!
***
Redaksiyaya Polşadan jurnalist gəlir. Polyak dili mütəxəssisi Rüfət Əhmədzadəni çağırırlar ki, tərcüməçilik etsin. Amma heç nə alınmır. Məlum olur ki, polyakla biri-birini anlamırlar. Hamı sual dolu nəzərlərlə Rüfətə baxanda o, üzünü qırışdırıb boynunu arxasını qaşıyır:
- Ayə, diyanın eee... deyəsən, mən çex dilini qutarmışdım axı...
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
