Kulis.az Əjdər Yunus Rzanın şeirlərini təqdim edir.

Ordum

Varlığım da sən, qüdrətim də sən,
Namusum, arım sən, qeyrətim də sən,
Tarixlərdən gələn heyrətim də sən,
Sənə arxalanır, inanır yurdum.
Sənin hünərinə min alqış, ordum.

Azadlıq ordumsan, xilaskarımsan,
Güvənc yerimsən sən, darda karımsan.
Nə yaxşı, nə yaxşı, şükür varımsan,
Aman verməyirsən yağıya, Qurdum.
Sənin hünərinə min alqış, ordum.

Sən dönüb şimşəyə alışdın, çaxdın,
Bir anda düşməni yandırıb, yaxdın.
Həsrət körpüsünə bayrağı taxdın,
O taylı, bu taylı nurlanır yurdum.
Sənin hünərinə min alqış, ordum.

Yaz, əsgər

Şad xəbərin xəbər gəlir dalıncan,
Xankəndini, Can Şuşanı alıncan,
Dayanma sən, son zəfəri çalıncan,
Tariximə yeni tarix yaz, əsgər.

Dığaların soy kökünü qaz, əsgər!
Yurdsuz illər ürəyimə xal salıb,
Məni dərdə o yurdsuzluq hal salıb.
Nə müddətdir boran alıb, qar alıb,
Dağlarıma gətir bahar, yaz, əsgər,
Tariximə yeni tarix yaz, əsgər.

Bu da yeni bir taledir, bir baxdı,
Yad əllərdən xilas olar xan taxtı.
Cıdır düzü həsrət qalıb nə vaxtdı,
Dinsin kaman, ötüşsün tar, saz, əsgər.

Tariximə yeni tarix yaz, əsgər.
Qanadlanıb könlüm yurda uçmağa,
Alaq basmış cığırları açmağa.
Az qalıbdır, Qarabağı qucmağa,
Tariximdə belə zəfər az, əsgər,
Tariximə yeni tarix yaz, əsgər.

• Qardaşını və oğlunu şəhid verən yeganə Xalq yazıçımız - Sabir Əhmədlinin göz yaşları…
• Pulla vəsiqə alan sürücülər, dərsdən qaçan tələbələr
• "Onlar daim ədəbiyyata alver kimi baxırlar" - Əyalətdən dünyaya boylanana adam