Kulis.az Əli Şirin Şükürlünün "Ədəbi suprematizm" silisləsindən yeni metamodern şeirlərini təqdim edir.

Proqnoz

Dəmiryol vağzalı. Topa-topa adamlar.

Gözləyirlər.

Hələ bilmirlər az sonra nə olacaq.

Ehtimalsa həmişə var - hava proqnozu kimi.

Topa-topa adamlar – kiçik sosioloji model.

Həmişə nə üçünsə birləşirlər adamlar.

Ortaq nəsə var görünür, amma

tək dayananlar da var.

Topa-topa adamlar – statistik seçmə;

müxtəlif cinsli, fərqli statusda, fərqli yaşda.

Orta qiymət çıxarmağa çalışıram:

hər biri eyni həm də - Eros.

Eros – yaşam instinkti.

Tərsi daha cəlbedici - ölüm instinkti Tanatos;

özünüqurbanvermə fenomeni, fədakarlıq,

qəhrəmanlıq doğurar həm də.

Hələ ki...

qəhrəmanlığa, fədakarlığa ehtiyac yox.

Sadəcə, qatar gözləyir adamlar

və hələ bilmirlər az sonra nə olacaq.

Qəfil çiskin yağış başlayır.

Elan:

Qatar texniki səbəblərdən 7 dəqiqə geçikir.

Hər kəs gözləyir

və nə olacağını yenə də dəqiq bilmir...

Topalar dağılıb artıq,

indi nizamla əyləşib adamlar

yumşaq oturacaqlarda.

Gözləyirlər.

8:00 -da yola düşür qatar:

Bakı – Pirşağı – Sumqayıt.

Hər adamın

bir stansiyada düşmə ehtimalı var.

... – 05.11.2026

Holizm

Elə şeylər var dağılsa da gözəl olur;

parçalanmış nar misalı - hər dənə bir aləm,

hər aləm bir estetika, həzz mənbəyi.

Amma bir məsələ var:

ha çalış yığasan o dənələri,

xeyri yox, yenidən nar alınmaz;

elə şeylər var

bütöv halında bir ayrı gözəllik.

Elə şeylər də var, dağılsa bitdi demək.

Nə dağılmış halı faydalı,

nə də geriyə dönüşü mümkün: nizamsızlıq – xaos;

heç bir qanunu da işə yaramaz:

görünür, “kəpənək qanad çalıb” hardasa.

Axşam qatarında

sınmış fincan qırıqlarını toplayan

gənc ananın məyusluğu anladır bir daha:

təkcə hissələrinin cəmindən

ibarət deyilmiş var olan.

Həyat da ki... bilirsiz də

zamanın cəm halında – kino lenti,

ayrı-ayrı anlar hamısı bir yerdə;

gah “nar dənələri”,

gah da qırıq-qırıq fincan misalı.

... – 15.09.2026

Zəncirotu

Bəzən lirik şeirlər də yazıram,

bir az da sentimental – xoşuma gəlməsə də.

Minimalist bir şeirimi xatırladım səni görəndə:

Dəriləndən sonra da

ətri gözəl olur güllərin.

Zəncirotu - sarı çiçək, sapsarı çiçək.

Elə şeylər var, tez-tez ötsən də yanından

görmürsən elə bil.

Zəncirotu; ot və zəncir...anlamadım, -

kim verib bu adı görəsən?

Zəncirotu - payızın sapsarı rəngi;

gözəllik və bir də intəhasızlıq yayılır

topa-topa bitdiyin məkanlardan.

Üzdüm səni, bağışla,

üzdüm ard-arda – 1, 2, 3, 4, 5;

üzülmə, sarı çiçək,

yoxluqda hər an varolma imkanı.

Sevdiyinə sahib olmaqsa

qəbahətdir həm də - bunu da anlayıram.

Əlimdə sarı çiçək

yol kənarında evakuator cəlb edir diqqətimi,

xarab olub, yük yerində də nasaz avtomobil.

Gülmək tutur məni; sənə güvəndiyim dağlar...

Üzümdə təbəssüm, uğur arzulayıram

evakuatoru işə salmağa çalışan iki adama –

elə təbəssümlə də cavab verirdilər ki,

birdən işə düşür faydalı texnika.

Görünür, doğrudan da yaxşı fikir

dəyişə bilər hadisəni; düşüncənin rəsmini çəkər

bu “ixtiyar”, bu “sirli-soraqlı” kainat,

güzgü misalı -

neçə baxsan o cür də var olar bəlkə də.

Ofisə qayıdıram.

Kim 5 çiçəyi görürsə,

təbəssüm yaranır üzündə.

Kimi gözəlliyindən söz açır,

kimi də faydasından.

Tez soldu amma

gözəl, zərif, faydalı sarı çiçək,

dəriləndən bir-iki saat keçməmiş

başı aşağı, məyus, qırmızı qələmqabıda;

az əvvəl gülümsəyirdi sanki,

bütün səadətlər tez bitir nədənsə.

Bağışla, üzdüm səni,

tələsdirdim taleyini, deyəsən, sarı çiçək,

indi üzüldüyün məkanlarda yerin boş,

bir də ətrafa yayılan sonsuzluq...

Deyirlər:

Hər işin sonu yaxşı olsun təki.

Zəncirotu - sapsarı gözəl çiçək,

ölümün necə... gözəl oldumu,

al rəngli qələmqabıda?

... – 30.10.2026.

• Raye “Mercury Prize” qazandıqdan sonra albomunun satışını 275 faiz artırdı
• Natəvan Dəmirçioğlunun “Açar” romanı: dil və üslub xüsusiyyətləri - Leyla Məmmədəliyeva
• Azərbaycanın “Qarabağ xalçası” Lima Metropoliten Muzeyinin mədəni irs kolleksiyasında