Azərbaycan, Qazaxıstan, Qırğızıstan, Özbəkistan, Türkiyə və Türkmənistan teatrlarının iştirakı ilə keçirilən TÜRKSOY Beynəlxalq Teatr Festivalına həsr edilmiş mətbuat konfransı keçirilib.

Kulis.az APA-ya istinadən xəbər verir ki, mətbuat konfransında TÜRKSOY-un Baş katibi Sultan Raev, Əməkdar incəsənət xadimi, sənətşünaslıq doktoru İsrafil İsrafilov, Azərbaycanın TÜRKSOY-dakı daimi nümayəndəsi Elçin Qafarlı iştirak ediblər.

TÜRKSOY-un Baş katibi Sultan Raev çıxışı zamanı festivalın əhəmiyyətindən danışıb.

O deyib ki, festivalın keçirilməsində məqsəd türk dünyası teatrşünaslarını bir araya gətirmək olub və festivala türk ölkələrinin tanınmış teatrşünasları qatılıblar.

Əməkdar incəsənət xadimi, sənətşünaslıq doktoru İsrafil İsrafilov bildirib ki, bu, TÜRKSOY tərəfindən keçirilən ilk festivaldır.

"Bu festival bir ilk olaraq fəaliyyətə başlayır. Festivalda türk dövlətlərinin teatrındakı problemlərin müzakirə ediləcəyi gözlənilir. Teatrın münsifləri kifayət qədər professional şəxslərdirlər və hesab edirəm ki, bütün proseslər teatr mədəniyyətinin xeyrinə olacaq. Hesab edirəm ki, bu əsl sənət bayramı olacaq", - teatrşünas deyib.

Azərbaycanın TÜRKSOY-dakı daimi nümayəndəsi Elçin Qafarlı çıxışı zamanı bildirib ki, bu festivala daxil olan 6 ölkədən təqdim edilmiş teatr tamaşaları öz ölkələrinin ən yaxşı tamaşası olaraq seçilib: "Buna görə hesab edirəm ki, bizi maraqlı bir festival gözləyir".

Diqqətə çatdırılıb ki, teatr festivalının Bakıda keçirilməsi heç də təsadüfi deyil. Belə ki, bu il Azərbaycan peşəkar milli teatrının yaradılmasının 150 illiyidir.

• Türkiyə və Fransa əməkdaşlığı - Fotoqrafiyanın 200 illiyi ilə bağlı
• Ədəbiyyat üzrə Nobel mükafatının qalibi açıqlandı
• AXC-nin diplomatı niyə Azərbaycana qayıtmağa qorxurdu? – Cavad xanın nəvəsinin taleyi