Xalq artisti Ramiz Məliklə Heydər məscidində vida mərasimi keçirilib.

Kulis.az APA-ya istinadən xəbər verir ki, vida mərasimində aktyorun ailə üzvləri, sənət dostları, mədəniyyət və ictimaiyyət nümayəndələri iştirak edib.

Akademik Milli Dram Teatrının bədii rəhbəri Mehriban Ələkbərzadə bildirib ki, Ramiz Məlikin xatirəsi əbədi olaraq onu sevənlərin yaddaşlarında qalacaq. O əlavə edib ki, Ramiz Məlikin dəfni ilə bağlı işlər yerli-yerində həyata keçirilib.

Azərbaycan Dövlət Akademik Musiqili Teatrının direktoru Əliqismət Lalayev isə Ramiz Məlikin hər zaman tamaşaçıların sevimlisi olduğunu, rolları ilə seçildiyini, səhnədə emosional və fərqli oyunu ilə fərqli obrazlar yaratdığını diqqətə çatdırıb: "Bizim Ramiz müəllimlə yaxşı münasibətimiz olub. Bir aktyor kimi onu çox sevmişəm. Bu gün onu son mənzilə yola salırıq. Allah rəhmət eləsin!"

Xalq artisti Hacı İsmayılov bir çox tamaşalarda Ramiz Məliklə tərəf müqabili olduğunu xatırlayıb. Aktyor "Ad günü” filmində də birlikdə oynadıqlarını qeyd edib.

“Ramiz Məliki başqa sənətkarlardan fərqləndirən onun kübarlığı idi. O, çox dözümlü, iradəli adam idi və uzun müddət idi ki, xəstə olmasına baxmayaraq, ümid edirdi ki, sağalacaq və yenidən səhnəyə qayıdacaq. Təəssüf ki, bu, mümkün olmadı. Akademik Milli Dram Teatrı və Azərbaycan Teatr Xadimləri İttifaqı adından Ramiz Məlikin ailəsinə, doğmalarına başsağlığı verirəm. Allah rəhmət eləsin!", - deyə o qeyd edib.

Əməkdar artist Ayşad Məmmədov isə mərhum sənətkarla ilk də Hüseyn Cavidin yubileyi münasibətilə keçirilən tədbirdə eyni səhnəni bölüşdüyünü deyib: “O, Hüseyn Cavidi, mən isə Arif obrazını oynayırdım. O da vaxtilə Arif rolunu oynamışdı. Buna görə sonralar zarafatla məni Arif deyə çağırırdı. Daha sonra Cəfər Cabbarlının "Yaşar" pyesində tərəf müqabili olmuşuq. Allah rəhmət eləsin, ruhu şad olsun".

Qeyd edək ki, Ramiz Məlik II Fəxri xiyabanda dəfn ediləcək.

• "Onun yaradıcılıq eşqi yaşamaqda davam edir..." - Nəriman Həsənzadənin xatirəsinə
• Zorla evləndirilən 17 yaşlı qız necə xilas edildi?
• Sazdan kamançaya: Milli musiqi alətləri TikTokda