Türkiyədəki Azərbaycan Mədəniyyət Mərkəzinin layihəsi ilə qardaş ölkə universitetləri arasında dahi Azərbaycan şairi, Türk dünyasının mütəfəkkiri Nizami Gəncəviyə həsr olunmuş “Nizami Gəncəviyə 100 məktub” adlı müsabiqə elan olunub.

Kulis.az xəbər verir ki, müsabiqənin əsas məqsədi Türk dünyasının ortaq dəyərlərinin, dünya ədəbiyyatının zirvəsi sayılan dahi Azərbaycan şairi, Türk dünyası mütəfəkkiri Nizami Gəncəvi irsinin elm, təhsil müəssisələri arasında daha geniş tanıdılması və təbliğidir.

Qeyd edək ki, layihəyə Türkiyədəki Yunus Əmrə İnstitutu və AMEA-nın Gəncə Bölməsi müvafiq dəstək göstərir.

Müsabiqədə Türkiyənin ədəbiyyat fakültəsi mövcud olan universitetlərinin tələbələri iştirak edəcək və bu məqsədlə Azərbaycan Mədəniyyət Mərkəzi tərəfindən Nizami Gəncəvi haqqında türk dilində nəşr olunan əsərlər, xüsusilə şairin “Xəmsə”si sözügedən universitetlərin kitabxanalarına göndəriləcək.

“Nizami Gəncəviyə 100 məktub” müsabiqəsinin əsas mövzu başlıqları müəyyən edilib: “Nizami Gəncəvi və Türk dünyası”, “Nizami Gəncəvinin “Xəmsə”sində Türkçülük ideyaları”, “Nizami Gəncəvi və Gəncə”, “Nizami Gəncəvinin yaradıcılığında hikmət fəlsəfəsi”, “Nizami Gəncəvinin yaradıcılığında ədalət anlayışı”, “Nizami Gəncəvi yaradıcılığında bəşəri dəyərlər: insan sevgisi”, “Leyli və Məcnun” müasir dövrdə: klassik eşqin çağdaş yozumu”, “Nizami Gəncəvinin yaradıcılığında qadın obrazları və qadının mənəvi ucalığı”, “Nizami Gəncəvi və incəsənət” mövzuları üzrə tələbələr dahi şairə xitabən məktublarını müsabiqəyə təqdim edə biləcəklər.

Müsabiqəyə martın 10-da start veriləcək v sentyabrın 30-da yekun vurulacaq.

Türkiyədəki Azərbaycan Mədəniyyət Mərkəzindən verilən məlumata görə, müsabiqəyə dair əlavə məlumatlar müsabiqədə iştiraka razılıq verən universitetlərə göndərilib.

• Çingiz Hüseynovun əsərləri niyə qadağan olunmuşdu?
• Məşhur aktyor vəfat etdi
• "Sarı mətbuat"dan meyarlar zirvəsinə - Pulitser mükafatı haqqında maraqlı faktlar