Yazıçı Kler Linç 1980-ci illərdə övladlarının qəyyumluğundan məhrum edilmiş lezbiyan qadınların real həyat hekayələrindən bəhs edən "A Family Matter" ("Ailə məsələsi") romanı ilə "Nero Book Awards"ın baş mükafatına — "Qızıl mükafat"a layiq görülüb.

Kulis.az xəbər verir ki, münsiflər heyətinin sədri Nik Hornbi kitabı həm oxunaqlı, həm də intellektual adlandıraraq əsərin uzun illər müzakirə olunacağını vurğulayıb.

Ötən ay "İlin debüt bədii əsəri" nominasiyasında qalib gələn Linç indi həm də 2025-ci ilin "Ən yaxşı kitabı" titulunu qazanıb. Maraqlıdır ki, yazıçı mükafatın sponsorlarından biri olan London Brunel Universitetinin fəxri professorudur. Lakin müsabiqə təşkilatçıları universitetin qalibin seçilməsində heç bir təsirinin olmadığını bəyan ediblər.

Romanın süjet xətti günümüzlə 1982-ci il arasında var-gəl edərək bir atanın və qızının həyatından ananın niyə qəfil yox olmasının səbəblərini üzə çıxarır. Müəllif bildirib ki, kitabı yazmağa onu dəhşətli bir statistika sövq edib: 1980-ci illərdə evli olan və övlad böyüdən lezbiyan qadınların təxminən 90%-i boşanma zamanı uşaqlarının qəyyumluğunu itiriblər.

Kler Linç "BBC Radio 4"ün "Woman’s Hour" proqramında o dövrün mənzərəsini belə təsvir edib:

"Ailələrə təzyiq göstərilirdi ki, "utanverici" və "rüsvayçı" insanı, yəni ananı ailədən kənarlaşdırmaq ən yaxşı yoldur. Məqsəd o idi ki, uşaq hələ körpə ikən hər şeyi unutsun, ailə isə sanki o qadın heç vaxt mövcud olmayıbmış kimi yaralarını sarıyıb yoluna davam etsin".

Yazıçı əsəri ərsəyə gətirərkən real məhkəmə protokollarından və qəzet arxivlərindən istifadə edib. O, real hadisələrin bədii təxəyyüldən daha sarsıdıcı olduğunu qeyd edib.

"Nero Book Awards" 2025-in qalibləri

"A Family Matter" 2013-cü ildən bəri bu mükafatı (və onun sələfi "Costa Book Awards"ı) qazanan ilk debüt romandır. Kler Linç 30 000 funt-sterlinq məbləğində baş mükafatı, digər nominasiya qalibləri isə 5 000 funt-sterlinq qazanıblar.

Mükafatçıların siyahısı:

Qızıl mükafat və Debüt bədii əsər: "A Family Matter" – Kler Linç

Bədii əsər: "Seascraper" – Benjamin Vud

Qeyri-bədii əsər: "Death of an Ordinary Man" – Sara Perri

Uşaq ədəbiyyatı: "My Soul, A Shining Tree" – Camila Qevin

• Hörmüz boğazında düyünlənib dünyanın ən yağlı tikəsi... - Günün şeiri
• “Molla Nəsrəddin” jurnalının 120 illiyinə həsr olunmuş sərgilər açıldı
• "Gözüm Tanrı taxtındadı..." - Qulu Ağsəsin şeirləri