Beynəlxalq Muğam Mərkəzinin direktoru, Əməkdar artist, tarzən, Özbəkistanın mədəniyyət elçisi Sahib Paşazadə Pakistanın Kəraçi şəhərində keçirilən Dünya Mədəniyyət Festivalında fəxri medala layiq görülüb.

Kulis.az xəbər verir ki, bu barədə Beynəlxalq Muğam Mərkəzi məlumat yayıb.

Bildirilib ki, medal Əməkdar artistə “Art Council” təşkilatının prezidenti Məhəmməd Əhməd Şah tərəfindən təqdim edilib. O, bu mükafata layiq görülən ilk sənətkardır.

Qeyd edək ki, Sahib Paşazadə bu günə kimi çoxsaylı beynəlxalq layihələrdə Azərbaycan tarını uğurla təbliğ etdiyinə görə müxtəlif medal və fəxri titullara layiq görülüb. Bu sıralamada Niaqara Beynəlxalq Musiqi Festivalında "Tarın Paqaninisi" xüsusi titulu (2008), Polşa və Azərbaycan arasında mədəni əlaqələrə verdiyi töhfəyə görə medal (2018 və 2021), 2022-ci ildə Yakutiya prezidenti tərəfindən təqdim edilən Yakutiya Respublikasının yaranmasının 100 illiyi münasibətilə təsis edilən qızıl medal, Türk Mədəniyyəti Təşkilatının (TÜRKSOY) dünyanın bir çox ölkələrində həyata keçirdiyi layihələrdə yaxından iştirakına görə TÜRKSOY-un baş katibi Sultan Raev tərəfindən “Nizami-880” medalı və TÜRSOY təşkilatının 30 illik medalı, Fransanın "Karyer-su-Puassi şəhər" medalı (2019) və nəhayət “Özbəkistanın mədəniyyət elçisi” fəxri adı və medalını misal çəkə bilərik.

Həmçinin qeyd edək ki, tarzən dünyanın müxtəlif ölkələrində tar aləti üzrə ustad dərsləri və mühazirələr keçərək milli musiqi alətimizin dünyada geniş təbliğinə nail olub. Bu fəaliyyət sayəsində də Özbəkistanın bir neçə ali təhsil müəssisəsinin fəxri professoru adına layiq görülüb.

• Azərbaycanın “Qarabağ xalçası” Lima Metropoliten Muzeyinin mədəni irs kolleksiyasında
• "İrəvan Qazılığının tarixi" kitabının təqdimat mərasimi keçirildi
• "Həqiqi dahini bu əlamətdən tanıya bilərsiniz..." - Conatan Svift