Nizami Gəncəvi adına Milli Azərbaycan Ədəbiyyatı Muzeyində Azərbaycan ədəbiyyatının görkəmli nümayəndəsi, AMEA-nın həqiqi üzvü, Xalq şairi Bəxtiyar Vahabzadənin 100 illik yubileyi ilə əlaqədar ədəbi-musiqili tədbir keçirilib.

Kulis.az xəbər verir ki, tədbiri muzeyin direktoru akademik Rafael Hüseynov açaraq görkəmli şairin ömür yoluna nəzər salıb, onun zəngin ədəbi irsi, milli poeziyada yaratdığı yeniliklər haqqında məlumat verib. O, Xalq şairi Bəxtiyar Vahabzadənin yaradıcılığı ilə Azərbaycan xalqının və mənəviyyatının bir hissəsinə çevrilmiş böyük insan olduğunu vurğulayıb. Qeyd edib ki, sağlığında da canlı tarix olan Bəxtiyar Vahabzadə sadəcə istedadlı söz ustası deyil, xalqın varlığı, taleyi, ruhu ilə qovuşmuş bir yurd fədaisidir. Şair bütün yaradıcılığı ilə mənsub olduğu xalqın yaddaşına hopmuş sənətkarlardandır.

Akademik Rafael Hüseynov şairlə bağlı xatirələrini bölüşərək, Bəxtiyar Vahabzadənin Azərbaycanın böyük idealları uğrunda mübarizə apardığını, 1960-cı illərdən başlayan milli azadlıq hərəkatının öncüllərindən biri olduğunu deyib. Bildirib ki, ustad şairimiz sovet imperiyasının repressiya maşının ən güclü vaxtlarında "Gülüstan" poemasını qələmə alıb və o zaman Şəkidə çıxan "Nuxa fəhləsi" qəzetində bu poemanı dərc etdirib. Böyük səs-küyə səbəb olan “Gülüstan” poemasına görə Bəxtiyar Vahabzadə təqib edilib, işdən çıxarılıb. Ulu Öndər Heydər Əliyev o zaman Bəxtiyar Vahabzadəni təhlükədən xilas edib, həbs olunmağa qoymayıb, onu yüksək ad və mükafatlarla təltif edib.

Daha sonra Bəxtiyar Vahabzadənin yaradıcılığından nümunələr, şairin sözlərinə bəstələnmiş mahnılar səsləndirilib, rəqs nömrələri ifa edilib.

Qeyd edək ki, ədəbi-musiqili tədbir Ədəbiyyat Muzeyinin Həmkarlar İttifaqı Komitəsi və Məktəblərlə və ictimaiyyətlə iş şöbəsinin birgə əməkdaşlığı ilə baş tutub.

• Romanına görə ABŞ-da qanun qəbul edilən Pulitserli yazıçı kim idi?
• Estrada ilə yanaşı elmi də "ağladan" müğənnilərimiz
• Məşhur aktrisa boykot edildiyini açıqladı – Səbəb