"Aqil Abbasın səhhəti düzəlib, gələn ayın əvvəli vətənə qayıdacaq".

Kulis.az xəbər verir ki, bu sözləri "525-ci qəzet"ə açıqlamasında xanəndə Səttar Nəsirov deyib.

Ankarada müalicə alan tanınmış yazıçı-jurnalist, Millət vəkili Aqil Abbasla görüşündən təəssüratları bölüşən S.Nəsirov köhnə xatirələri yada salıb, Aqil müəllimlə dostluqlarından bəhs edib: "Aqil Abbasla 50 ilə yaxındır dostluq edirik. O, işində peşəkar olduğu kimi, dostluqda da çox etibarlıdır. Mən Ankarada idim, işlərimlə əlaqədar olaraq, İstanbula getmişdim. Dostumuz Aydın Ağazadə mənə dedi ki, Aqil Abbas səhhəti ilə bağlı Ankaraya gəlib, xanımı, "Ədalət" qəzetinin baş redaktoru İradə Tuncay da yanındadır. Xəbər tutan kimi İradə xanıma zəng vurdum, Aqillə danışdım. Aqil Abbasın səsindən qəriblik hiss elədim, bu məni kövrəltdi. İşlərimi qaydasına qoyub Ankaraya, Aqil müalicə alan xəstəxanaya yollandım. Xeyli söhbətləşdik, zarafatlaşdıq, olanları-keçənləri yada salıb köks ötürdük".

O, Aqil Abbas üçün narahat olanlara səslənərək hər şeyin yaxşı olduğunu qeyd edib: "Aqil Abbasın səhhəti çox yaxşıdır, həkimlər onu yaxşı müalicə ediblər. Dedim, Aqil, bir şəkil çəkdirək. Özünün icazəsi ilə çəkdirdiyim şəkli sizinlə, oxucularla paylaşmaq istəyirəm. Qoy ondan ötrü narahat olanlar, onu sevənlər arxayın olsunlar".

• Səlim Babullaoğlu Avropa Elm və Sənət Akademiyasının üzvü seçildi
• "Türk özünü qorumur, Tanrı türkü qorusun!" - Fikrət Sadıq haqqında
• "Danışanda böyük ədəbiyyat çağırışları edirlər..." - Polemika