Kulis.az Rəna Nevzatın yeni yazısını təqdim edir.

Bu günün səhərini də təəssüf ki, qaramat bir xəbərlə açdıq: Abşeron rayonunun Aşağı Güzdək qəsəbəsinin imamı Axund Turab məscidə Quran kursuna gələn 16 yaşlı qızı qaçırıb. Azmış kimi, üstəlik məscidin 20 min manatını da ələ keçirib, yoxa çıxıb.

Bizə əsrlər boyu öyrədilən odur ki, din insanı əxlaqa, ədalətə və vicdana dəvət edən müqəddəs bir yol, dini rəhbərlər isə bu yolun qoruyucusu, əxlaq timsalıdır. Amma görünür, bizim “mübarək” axundun yol göstəriciliyi bir qədər fərqlidir — qız qaçırmaq və məscid üçün ayrılan vəsaitləri şəxsən mənimsəmək. Dələduz axund öz “cahil cəsarəti”nə o qədər qapılıb ki, deyəsən, zaman anlayışı da təhrif olunub. O, orta əsrlərin teokratik monarxiyasında deyil, dünyəvi, hüquqi bir dövlətdə yaşadığını da unudub. Məsələnin gedişatından aydın olur ki, bəzi fərdlərin məsuliyyətsizliyini, vicdansızlığını nə dini baxışlar tərbiyə edə bilmir, nə də müqəddəs Quran...

Cəmiyyətin həssas yanaşdığı sahələrdə belə hadisələrin baş verməsi isə xüsusilə kəskin reaksiyalar doğurur və doğurmalıdır.

Məni düşündürən bir məqam var, əcəba, müasir dövrümüzün “Şeyx Nəsrullah”ı məscidin pulunu cibinə qoyub, valideynlərinin də etibar edib Quran öyrənməyə göndərdiyi həddi-büluğa çatmamış qızı qaçırarkən düşünməyibmi ki, çox uzağa gedə bilməyəcək? Bu ölkənin yazılmış qayda-qanunları, eləcə də yazılmamış əxlaq qanunları səni o yolun başındaca yaxalayacaq axı...

Aydın məsələdir ki, dövlət hüquq-mühafizə orqanları tərəfindən müvafiq tədbirlər həyata keçiriləcək və “imam” qanunlara müvafiq şəkildə cəzasını alacaq, bəs bundan sonra imanına güvənib getdiyi imama olan inamı qırılan, həyatı qaralan o azyaşlı qızın travmasını hansı dini baxışlar sağalda biləcək?

Hadisə cəmiyyətə ciddi mesaj verir: hər bir insan, xüsusilə də dini təmsil edən nümayəndələr daşıdıqları vəzifənin məsuliyyətini unutmamalıdır.

Hadisənin ikinci bir “incə” tərəfi - 20 min manatlıq büdcənin “möcüzəvi şəkildə” yoxa çıxması isə göstərir ki, dini idarəçilik sistemində olan ciddi çatışmazlıqlar da yenidən gözdən keçirilməlidir.

Bu xəbər təkcə bir ailənin fərdi faciəsi deyil, eyni zamanda etimadın, məsuliyyətin və insanlıq dəyərlərinin ciddi sarsıntısıdır.

Bu sarsıntıların təkrarlanmaması isə təkcə dövlətin deyil, həm də ailələrin, valideynlərin məsuliyyətidir. “Din, iman” deyib qaça-qaça övladlarını təslim etdikləri yerdəki heç də hər kəs “imam övladı” olmur. Ruhanilərə, din xadimlərinə cəmiyyətin göstərdiyi hörmət və inamın necə sui-istifadə oluna biləcəyinin “canlı nümunəsi” bunu göstərdi. Övladlarınızı gözüyumulu hara gəldi aparıb təslim eləməyin, düşünün, sorğulayın, diqqətli olun. Müqəddəs Qurani-Kərimin surələrində ən çox təkrarlanan ayələrdən biri də budur: “Heç düşünmürsənmi?..”

• Şəhid anasının etdiyi hərəkətə nə ad vermək olar?
• Məşhur pianoçu Bakıda çıxış etdi
• Yazıçı Mirmehdi Ağaoğlunun imza günü olacaq