Bəxtiyar Vahabzadəsiz 5 il

Bəxtiyar Vahabzadəsiz 5 il
13 fevral 2014
# 13:18

Bu gün Xalq Şairi Bəxtiyar Vahabzadənin vəfatından beş il ötür. Kulis.Az şairin "Bir salama dəymədi?" şeirini təqdim edir.

Bir salama dəymədi?

Bu gün mən səni gördüm,
Salam vermək istədim,
Üzünü yana tutdun.
Söylə, illərdən bəri
Qəlbimizin bir duyub
bir vurduğu illəri,
Axı, nə tez unutdun?
Beş ildə gözümüzdən axan o qanlı sellər,
Bir salama dəymədi?

Heç üzümə baxmadan yanımdan necə keçdin?
Sən eşqin salamını qorxuyamı dəyişdin?
Yoxsa sən öz əhdinə, ilqarına ağ oldun?
O qədər yaxın ikən, bu qədər uzaq oldun.
Şirin gülüşlərimiz, acı fəğanlarımız
Bir salama dəymədi?

Qayğılı anlarımız, qayğısız anlarımız
Bir salama dəymədi?
Sən neylədin, bir düşün!
Yalnız indi anladım; ah, sən daha mənimçün
Əlçatmaz bir çiçəksən,
Yaşanmış günlərim tək geri dönməyəcəksən!...

Qop ey tufan, əs ey yel! Xəzəl olum, tökülüm
Düz beş il ürəyimdə
Bəslədiyim məhəbbət, bir salama dəymədi.
Bir günlük həsrətimə dözə bilməyən gülüm,
Bəs nə oldu? Bu həsrət bir salama dəymədi?
Getdin, dalınca baxdım, can ayrıldı canımdan,
Sən necə etinasız ötə bildin yanımdan?
Ah çəkdim, başım üstə yarpaqlar əsdi, gülüm,
Sənin qəlbin əsmədi.
Arxana da baxmadın!
Niyə sənin yolunu məhəbbətin kesmədi?...

Qazancımız de, bumu?
Deyilməmiş o salam əlvidamız oldumu?
Sən mənə zülm eylədin, mənə zülm yaraşır.
Bir salama dəyməyən eşqə ölüm yaraşır!

# 1750 dəfə oxunub

Oxşar xəbərlər

Ateistlər deyir, fırlanır, imamlar deyir, yox SORĞU

Ateistlər deyir, fırlanır, imamlar deyir, yox SORĞU

15:45 20 fevral 2015
Xanlar Əhmədov: “O boyda Bulvarda bir dənə heykəl yoxdur”

Xanlar Əhmədov: “O boyda Bulvarda bir dənə heykəl yoxdur”

17:35 17 fevral 2015
Tofiq Ağababayev:"Bakının açarı Brejnevdə getdi"

Tofiq Ağababayev:"Bakının açarı Brejnevdə getdi"

14:10 16 fevral 2015
Bir gecəlik qadının sirləri

Bir gecəlik qadının sirləri

13:21 13 fevral 2015
Nəyin kəsilməyini heç istəmirsiz?-küçə sorğusu

Nəyin kəsilməyini heç istəmirsiz?-küçə sorğusu

18:52 2 fevral 2015
Bakıda seks sorğusu

Bakıda seks sorğusu

11:16 29 yanvar 2015
Ana səhifə Reels Yazarlar Xəbərlər