Nizami Kino Mərkəzində Baku TV-nin istehsal etdiyi “Söz” qısametrajlı sənədli filminin təqdimat mərasimi keçirilib.
Kulis.az APA-ya istinadən xəbər verir ki, film 44 günlük Vətən müharibəsinə həsr olunub. Ekran işində Baku TV-nin əməkdaşı, Vətən müharibəsi iştirakçısı Ələkbərin həyat hekayəsi öz əksini tapıb.
Təqdimat mərasimində çıxış edən Baku TV-nin direktoru Ramin Cəfərov bildirib ki, “Söz” sənədli filminin beynəlxalq müsabiqələrdə qələbə qazanması Baku TV-nin uğurudur və bu, komandanın zəhmətinin və peşəkarlığının nəticəsidir.
Qarabağ həqiqətlərinin dünya ictimaiyyətinə çatdırılması məqsədilə film rus və ingilis dillərində təqdim olunur.
Qeyd edək ki, “Söz” filmi Los-Ancelesdə keçirilən və hər il minlərlə filmin təqdim olunduğu “Accolade Global Film Competition”da da mükafata layiq görülüb. Ekran əsəri, həmçinin “Roma Prisma Film Awards” yarışmasının finalçısı olub.
