İndi
Sənsizəm deyəsən dəli oluram,
Sənli günlərimi gəzirəm indi.
Bir vaxtı sevilən bəxtiyar idim,
Gözümün yaşını süzürəm indi.
Bir günlük həsrətə çətin dözürdüm,
İndi gələcəksən deyə gəzirdim,
Sənə vermək üçün güllər üzürdüm,
Bir düşün özümü üzürəm indi.
Mən axı kimsəni, üzə bilmərəm,
Sənsiz atdım, atıb gəzə bilmərəm,
Dedim yoxluğuna dözə bilmərəm,
Sənin yoxluğuna dözürəm indi.
Dağlar
Qürbət eldə saça elə dən düşüb,
Atam qocalıbdı elə, a dağlar.
Necə qocalmasın, sevgili qızlar,
Həsrətdir qoynunda gülə, a dağlar.
Xəlbirsiz içimizdə çox ələnmişik,
Vətəndə hər küncə səpələnmişik,
Biz qaçqın adıyla ləkələnmişik,
Silinməz versən də selə, a dağlar.
Fələk qocaların qəddini büküb,
Analar çox sizə göz yaşı töküb,
Sizsiz çoxları da dünyadan, köçüb,
Fələk amansızdı belə, a dağlar.
Dilində tükənməz şuarı sizsiz,
Ömür verə bilmir qərarı sizsiz,
Vallah əyilməyən vüqarı sizsiz,
Dönür Həsənoğlu külə, a dağlar.!
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
