Dünya kinosunun ən nüfuzlu festivalları sayılan Venesiya, Tellurayde və Toronto film festivallarının başa çatması ilə 2027-ci ilin "Oskar" yarışında "Ən yaxşı film" kateqoriyası üzrə iddialı olan layihələrin ilkin cədvəli formalaşmağa başlayıb.

Kulis.az xəbər verir ki, "Vanity Fair" nəşrinin "Little Gold Men" podkast komandası tərəfindən hazırlanan erkən proqnozlara görə, artıq 7 fərqli ekran işi Akademiya Mükafatları üçün əsas favoritlər sırasına yüksəlib.

Martın 14-də keçiriləcək növbəti "Oskar" mükafatlandırma mərasiminə hələ aylar qalsa və tarazlıqların dəyişmə ehtimalı yüksək olsa da, payız festivalları yarışın əsas ritmini müəyyən edib.

Bu ilin ən diqqətçəkən çıxışını Toronto Beynəlxalq Film Festivalında (TIFF) "İzləyici Seçimi" (People's Choice Award) mükafatını qazanan ispandilli "Netflix" istehsalı – "La Bola Negra" edib. Dünya premyerasını Kann Film Festivalında edən və Telluraydedə də ayaqüstə alqışlanan bu filmin Toronto zəfəri mühüm əhəmiyyət daşıyır. Çünki əvvəlki illərdə "The Fabelmans", "Nomadland", "Jojo Rabbit" və "Green Book" kimi "Oskar" qazanan və ya namizəd olan şedevrlər də məhz Torontoda bu mükafata layiq görülmüşdü. Kanndan payız festivallarına uzanan digər bir uğurlu layihə isə "Club Kid" olub.

Venesiya Film Festivalında Con Malkoviçə "Ən yaxşı aktyor" mükafatını qazandıran, rejissor Martin MakDonaxın (Martin McDonagh) imzasını daşıyan "Wild Horse Nine" və Cessi Ayzenberqin musiqili teatr dünyasından bəhs edən "The Debut" dram-komediyası da güclü namizədlər arasındadır.

Torontodan iki sürpriz, Kanndan "Qızıl Palma"

Torontoda dünya premyerasını edən "I Play Rocky" və "Being Heumann" filmləri festivalın "İzləyici Seçimi" yarışında müvafiq olaraq ikinci və üçüncü yerləri tutaraq "Oskar" radarında özlərinə yer ediblər. Tarix göstərir ki, Torontoda bu pillələrdə qərarlaşan filmlər (məsələn, 2024-cü ildə üçüncü olan "Anora" və ya ötən ilin ikincisi "Frankenstein") sonradan Akademiya Mükafatlarında böyük zəfərlər əldə edirlər.

Kann Film Festivalında baş mükafatı – "Qızıl Palma Budağı"nı qazanan "Fjord" (Norveçdə dindar bir ailənin mürəkkəb həyatından bəhs edir) payız festivallarında ziddiyyətli reaksiyalarla qarşılanıb. Əvəzində, Cənubi Koreya kinosunun ustadı Li Çan Donun Venesiyada "Böyük Münsiflər Mükafatı"nı qazanan "Possible Love" filmi Akademiyanın beynəlxalq kinoya artan marağı fonunda mövqeyini xeyli gücləndirib.

Nyu-Yorka qalan ümidlər və tarixi ehtimal

Sentyabrın 25-də başlayan Nyu-York Film Festivalı (NYFF) da yarışın dinamikasını dəyişməyə iddialıdır. Aktyor Pedro Paskalın klassik musiqi ifaçısı (çellist) kimi çıxış etdiyi "Behemoth!" filmi məhz burada dünya premyerasını edəcək.

Bundan əlavə, Neytan Filder və Lens Oppenheymerin rezissorluğu ilə Elizabet Holms haqqında çəkilən "You Can See Everything" sənədli filmi Telluraydedəki sürpriz nümayişdən sonra Nyu-Yorkda da ekranlara çıxacaq. Bu film "Ən yaxşı film" kateqoriyasında tarixi bir presedent yarada bilər, çünki indiyədək heç bir sənədli film "Oskar"ın əsas kateqoriyasında namizədlik əldə edə bilməyib.

Payız festivalları "Oskar" üçün niyə həlledici rol oynayır?

Hollivud və beynəlxalq kino sənayesində avqustun sonundan sentyabrın sonunadək davam edən Venesiya, Tellurayde və Toronto festivalları qeyri-rəsmi olaraq "Oskar mövsümünün başlanğıcı" adlanır. Kino akademiyasının üzvləri, nüfuzlu tənqidçilər və distribyutorlar ilin ən güclü bədii filmlərini məhz bu üç festivalın nəticələrinə görə müəyyən edirlər. Venesiya filmlərin "art-haus" və intellektual çəkisini, Tellurayde peşəkar kino sənayesinin rəğbətini ölçürsə, Toronto festivalı (TIFF) kütləvi tamaşaçı reaksiyasının ən dəqiq barometri sayılır. Torontoda tamaşaçıların səsverməsi ilə seçilən əsas mükafatı qazanan filmlərin 90%-dən çoxu sonradan birbaşa "Ən yaxşı film" nominasiyası üzrə "Oskar"a namizəd olur.

• "Müəllifin mirajı ümidi sınağa çəkir..." - Nihatın qəhrəmanları hara qaçırlar?!
• Ekskursiya - Orxan Həsəninin yeni hekayəsi
• Yunan libasındakı türk alpı... - Onlarla oxşarlıq təsadüfi ola bilərmi?