Boris Akuninin yenicə nəşr olunmuş “Qara şəhər” romanı Bakı haqqındadır. Romanda hadisələr 1914-cü ilin Bakısında baş verir.

Akuninin əsərlərinin həmişəki qəhrəmanı xarizmatik detektiv Erast Fandorinin on dördüncü macərasında başına maraqlı hadisələr gəlir. Xidmətçisi Masa ilə Bakıya gələn detektiv burda Odissey adlı terroristi axtarır. Detektiv gözlənilməz halda Bakıda xanımı ilə qarşılaşır. Daha sonra isə Fandorinin xidmətçisi bir erməni tərəfindən güllələndiyində, detektiv özünə Qasım adlı qoçunu köməkçi götürür.

Akunin Bakını əsrarəngiz, koloritli, sehrli və təhlükəli bir şərq şəhəri kimi təsvir edir.

Akuninin yeni romanının ərsəyə gəlməsində fransız “Le Fiqaro” qəzetinin az rolu olmayıb. Belə ki, qəzet 2008-ci ildə aralarında Boris Akunin də olmaqla Milan Kundera, Artur Peres-Reverte, Duqlas Kennedi və başqa yazarlara qəzetin Homerdən seçdiyi bir misrasıyla başlayan əsər yazmağı sifariş veribmiş.

Əsl adı Qriqoriy Çxarataşvili olan yazıçı 1956-cı ildə Gürcüstanda gürcü ata və yəhudi ananın ailəsində anadan olmuşdur. O, uzun müddət yaponşünas kimi fəaliyyət göstərmiş, Yukio Misima, Kobo Abe, Kendzi Maruyama və başqa yapon yazıçılarının əsərlərini rus dilinə çevirmişdir.

Yazıçı Boris Akunin imzasından başqa Anatol Brusnikin və Anna Barisova imzaları ilə də yazmışdır.

O, Boris Akunin imzası ilə 1998-ci ildən yazır. İlk əsəri “Qış kraliçası” adlanır. Onun “Qara şəhər” romanı bu imzayla yazdığı 14-cü romanıdır. Akunin romanlarında hadisələr Çar Rusiyası dövründə baş verir.

Rusiyanın məşhur detektiv yazıçılarından olan Akuninin əsərlərinin satışı 25 milyondan çoxdur.

• Ədəbi-musiqili proqram: "Səninlə dünyada bəxtiyaram mən"
• Tofiq Bakıxanovun yubileyinə həsr olunmuş müəllif konserti
• Lənkəranda ANİMAFİLM festivalı keçirildi