Yuğ Dövlət Teatrının gənc rejissoru Aytən Məmmədova və Kukla Teatrının rejissoru Elşad Rəhmanzadə Moskvadan qayıdıb. Kulis.az-ın verdiyi xəbərə görə gənc rejissorlar Azərbaycan Teatr Xadimlərinin təşəbbüsü və yaxından dəstəyi ilə Moskvada A.P.Çexov festivalı çərçivəsində keçirilən “Gənc rejissorların labaratoriyası”nın işində iştirak edib. 7-13 iyun tarixlərində “XXI əsrin teatrı. Keçmiş təcrübə və gələcək axtarışlar” adı ilə keçirilən labaratoriyada gənc rejissorlar Moskvanın teatr mühiti ilə tanış olmaq, nəinki Rusiya, eləcə də dünya teatr məkanında kifayət qədər tanınan rejissorlar Kirill Serebrennikov, Kama Ginkas, Viktor Rıjakov, Timur Çxeidze, teatrşünas Marina Davıdovanın ustad dərslərində iştirak etmək imkanı qazanıblar. Master klasslarda iştirak edən Aytən Məmmədova həmçinin festival tamaşalarına baxa bildikləri üçün özünü şanslı hesab etdiyini söylədi: “Baxdıqlarımız arasında Almaniya teatrının Kafkanın “Proses” əsərinin əsasında hazırladığı tamaşa vardı. Fransadan iki tamaşaya da baxdıq. Səhnə tərtibatında bir çox yeniliklər gördük. əlaqələrimiz yarandı və hətta Net festivalının art prezidenti, "Teatr" jurnalının redaktoru Marina Davıdova festival üçün yanvar ayına qədər iki tamaşamızın lentini göndərməyi istədi”.

Labaratoriyada Azərbaycanlı rejissorla yanaşı keçmiş MDB məkanına daxil olan ölkələrdən – Rusiya, Belarusiya, Ukrayna, Moldova, Gürcüstan, Latviya, Litva və s., eləcə də Çin Xalq Respublikasından nümayəndələr iştirak edib.

Bu layihənin gələcəkdə də davam etdirilməsi, gənc rejissor, aktyor, rəssam və teatrşünasların beynəlxalq miqyaslı tədbirlərdə iştirakı gözlənilir.

• Nasistlərin "degenerativ sənət" adlandırdığı tablo - Oskar Şlemmerin "Bauhaus pilləkəni"
• Dərisini soydular, amma susdura bilmədilər – İmadəddin Nəsiminin edamının arxasındakı gizli səbəblər
• “İRS” beynəlxalq jurnalının özbək dilində ilk nömrəsi nəşr olundu