Bu gün tanınmış italyan rəssam Qvido Reninin anım günüdür.

Kulis.az “Palitra” rubrikasında sənətkarın 3 məşhur əsəri haqqında materialı təqdim edir.

Qvido Reni İtaliyanın Bolonya şəhərində musiqiçi ailəsində anadan olmuş, ilk sənət təhsilini Denis Kalvaertin emalatxanasında almışdır.

Qısa müddət sonra Karraççi qardaşlarının təsis etdiyi məşhur "Accademia degli İncamminati" məktəbinə qoşularaq Bolonya barokko üslubunun əsas nümayəndələrindən birinə çevrilmişdir.

Romaya köçdükdən sonra Papa sarayı üçün mühüm sifarişlər icra etmiş, Karavaco realizmi ilə intibah klassisizmini sintez edən özünəməxsus zərif üslub yaratmışdır.

Əsərlərindəki ideallaşdırılmış gözəllik, mənəvi saflıq və zərif rəng palitrasına görə müasirləri tərəfindən ona "İlahi” ləqəbi verilmişdir.

Həyatının son illərində qumar aludəçiliyi səbəbindən ciddi maliyyə çətinlikləri yaşamış, buna görə də emalatxanasında tələsik çəkilən işlərə üstünlük verməyə məcbur olmuşdur.

1642-ci ildə doğma şəhəri Bolonyada vəfat etmiş və San Domeniko bazilikasında dəfn olunmuşdur.

"Baş mələk Mikayıl İblisi məğlub edir”

Romadakı Kapuçin monastırının Santa Maria della Concezione kilsəsi üçün sifariş edilmişdir.

Reni bu işdə şər qüvvələr üzərində ilahi ədalətin mütləq zəfərini təcəssüm etdirməyi hədəfləmişdir.

Baş mələk Mikayıl fiziki güc tətbiq etmədən, zərif və səma yüngüllüyü ilə ayağını İblisin başı üzərinə qoyub.

İblisin çirkin və qaranlıq cizgiləri ilə Mikayılın ideal, qüsursuz və işıqlı üz anatomiyası arasında kəskin dramatizm var.

Əsər XVII–XVIII əsr dini rəngkarlığında mələk surətlərinin və "ilahi zəfər" kompozisiyalarının əsas etalonuna çevrilmişdir.

Tablo hazırda İtaliyanın Roma şəhərindəki Santa Maria della Concezione kilsəsindədir.

"Atalanta və Hiptomen”

Qaçışda heç kimə uduzmayan cəld Atalantanı məğlub etmək üçün Hiptomen Veneranın verdiyi qızıl almaları yerə atır, Atalanta onları toplamaq üçün ayaq saxlayarkən yarışı uduzur.

Reni bu dramatik anı kətana köçürmüşdür.

Rəssam personajların hərəkətini donduraraq mükəmməl həndəsi diaqonal balans yaradıb.

Solğun dəri tonları, fırtınalı alatoran fon və fiqurların bədən plastikası əsərə antik heykəltəraşlıq havası qatır.

Əsər anatomiya və hərəkətin kətanda dondurulması texnikası ilə Fransa akademizminin inkişafına mühüm təsir göstərmişdir.

Tablo İspaniyanın Madrid şəhərindəki Prado Muzeyində sərgilənir.

"Avrora”

Romada Kardinal Ssipione Borgezenin sifarişi ilə “Casino dell'Aurora Pallavicini” sarayının tavanı üçün çəkilmişdir.

Səhər ilahəsi Avroranın günəş tanrısı Apollonun döyüş arabası önündə işıq saçaraq gedişi təsvir edilir.

Parlaq qızılı işıq, axıcı parçalar və simmetriya süjetə təkrarolunmaz aristokratik sakitlik verilmişdir.

Tavan rəsmi olmasına baxmayaraq, sanki divardan asılmış kətan kadrı kimi çərçivələnərək təsvir edilmişdir.

Əsər neoklassisizm cərəyanının yaranmasına zəmin hazırlamış və saray interyer rəngkarlığında yeni dövr açməşdır.

• "Bunker" filminin ulduzu vəfat etdi
• Venesiyada “Ən yaxşı aktyor" mükafatı təqdim edildi
• Laçında Şəhər Günü münasibətilə konsert keçirildi