SSRİ Xalq artisti Lyudmila Çursina vəfat edib.

Kulis.az xəbər verir ki, bu barədə Rusiya Ordusu Teatrı öz rəsmi saytında məlumat yayıb.

Teatrın yaydığı bəyanatda məşhur aktrisanın itkisi ilə bağlı bu sözlər yer alıb:

"Dərin hüznlə bildiririk ki, uzun sürən xəstəlikdən sonra SSRİ Xalq artisti Lyudmila Alekseyevna Çursina həyatla vidalaşıb".

Məlumatda vurğulanır ki, Çursina milyonlarla tamaşaçının sevimlisinə çevrilmişdi. Teatr onu "yeganə və təkrarolunmaz, əsl qəhrəman, dahi rus dram aktrisası" kimi xarakterizə edib. Aktrisa ilə vida mərasimi barədə yaxın vaxtlarda əlavə məlumat veriləcəyi bildirilib.

Lyudmila Çursina rəsmi versiyaya görə, 1941-ci il iyulun 20-də anasının təxliyə edildiyi Düşənbə şəhərində anadan olub. Lakin aktrisa özü Pskov vilayətinin Qruzdovo kəndi yaxınlığındakı tibb batalyonunda dünyaya gəldiyini deyirdi.

1959-cu ildə məktəbi bitirdikdən sonra o, Moskva Aviasiya İnstitutuna daxil olmağı planlaşdırırdı. Ancaq rəfiqəsinə qoşularaq sınaq məqsədilə teatr ali məktəblərinə sənəd verir və birdən-birə üç nüfuzlu təhsil ocağına – Ümumittifaq Dövlət Kinematoqrafiya İnstitutuna, Rusiya Teatr Sənəti İnstitutuna və B.V. Şşukin adına Teatr Məktəbinə qəbul olunur. O, seçimini sonuncudan yana edir.

Bütün yaradıcılıq karyerası ərzində bir neçə teatrın səhnəsini bölüşən sənətkar 1974–1984-cü illərdə A.S. Puşkin adına Leninqrad Dram Teatrında çalışıb, burada istər klassik, istərsə də müasir tamaşalarda fəal rol alıb. 1984-cü ildən etibarən isə Mərkəzi Akademik Sovet Ordusu Teatrına keçib.

Onun ən əhəmiyyətli rollarından biri F.M. Dostoyevskinin romanı əsasında hazırlanan "İdiot" tamaşasındakı Nastasya Filippovna obrazıdır.

• "Bunker" filmi ayaq üstə alqışlandı
• "Sən heç kəsə qoşulma..." - Azərbaycanlı müəlliflərin tərcüməsində "Gözlə məni"
• "Ölüm yalnız ürəyin dayanması deyil" - "Şeytan əməli" haqqında