İkinci Türk Dünyası Gənc Şairlər Festivalı çərçivəsində Ağdam Muğam Mərkəzində Özbəkistan Jurnalistlər Birliyinin sədri, tanınmış şair və publisist Şöhrət Arifin Azərbaycan dilində nəşr olunan “Məktubdur ömrüm” kitabının təqdimatı keçirilib.

Kulis.az xəbər verir ki, Dünya Gənc Türk Yazarlar Birliyinin başçısı, şair-publisist İntiqam Yaşarın moderatorluğu ilə baş tutan tədbirdə TÜRKSOY-un baş katibi, yazıçı Sultan Raev, Azərbaycan Yazıçılar Birliyinin (AYB) Beynəlxalq məsələlər üzrə katibi, şair Səlim Babullaoğlu, Ankara Sosial Elmlər Universitetinin rektoru Musa Kazım Arıcan, Türkiyə Yazarlar Birliyinin sədri Muhammed Enes Kala, Türkmənistan Mədəniyyət Nazirliyinin əməkdaşı Akmurad Rəcəbov, eləcə də Türk dünyasından gəlmiş tanınmış ədəbiyyat və mədəniyyət xadimləri iştirak ediblər.

Çıxış edənlər son illərdə Azərbaycan ilə Özbəkistan arasında ədəbi-mədəni əlaqələrin daha da inkişaf etdiyini vurğulayıblar. Natiqlər Şöhrət Arifin yaradıcılığının Azərbaycan oxucusuna təqdim olunmasını iki qardaş xalqın ortaq mənəvi dəyərlərinin təbliği baxımından mühüm hadisə kimi dəyərləndiriblər.

Bildirilib ki, nəşr Türk dünyasının ədəbi inteqrasiyasına, qarşılıqlı tərcümə ənənələrinin zənginləşməsinə və mədəni əməkdaşlığın genişlənməsinə dəyərli töhfədir.

“Məktubdur ömrüm” kitabı Dünya Gənc Türk Yazarlar Birliyi ilə “Regional Hüquqi və İqtisadi Maarifləndirmə” İctimai Birliyinin birgə layihəsi çərçivəsində ərsəyə gəlib. Layihənin əsas məqsədi Türk dünyasının ortaq mənəvi irsini təbliğ etmək, Azərbaycan–Özbəkistan ədəbi əlaqələrini daha da möhkəmləndirmək, çağdaş özbək poeziyasını Azərbaycan oxucularına tanıtmaq və Türk xalqları arasında ədəbi-mədəni əməkdaşlığı dərinləşdirməkdir.

Nəşri Azərbaycan dilinə AYB üzvü, “İsmayıllı Yazarları” İctimai Birliyinin sədri, şair-publisist Şahməmməd Dağlaroğlu (Soltanov) və Beynəlxalq “Alaş” Ədəbiyyat Mükafatı laureatı, şair-publisist Əkbər Qoşalı uyğunlaşdırıblar. Kitabın redaktoru Əkbər Qoşalı, məsləhətçiləri “Regional Hüquqi və İqtisadi Maarifləndirmə” İctimai Birliyinin sədri Arzu Bağırova və Özbəkistanın “Kitab dünyası” qəzetinin baş redaktoru, şair-publisist Xasiyyət Rüstəmdir.

Bədii rəyçilər AYB katibi, şair-tərcüməçi Səlim Babullaoğlu və Dünya Gənc Türk Yazarlar Birliyinin sədri, şair İntiqam Yaşar, layihənin koordinatoru isə “Regional Hüquqi və İqtisadi Maarifləndirmə” İctimai Birliyinin sədr müavini Nilufər Lətifdir.

Tədbir zamanı müəllifin yaradıcılığı haqqında ətraflı məlumat verilib, kitabdan şeir nümunələri səsləndirilib.

Sonda qonaqlar müəllifi təbrik edərək bu nəşrin Azərbaycan və Özbəkistan arasında yeni ədəbi layihələrin həyata keçirilməsinə zəmin yaradacağına əminliklərini bildiriblər.

• İlk sovet serialının ulduzu vəfat etdi
• Napoleonun portretlərini çəkən məşhur neoklassik rəssam - Jak-Lui David kimdir?
• Şamaxıda növbəti Üzüm və Şərab Festivalı keçiriləcək