Atatürk Mərkəzində tanınmış şair Rafiq Ələkbərin “Bu qapı bəlkə tövbədir?” adlı yeni kitabının təqdimat mərasimi keçirilib.

Kulis.az xəbər verir ki, tədbirdə müəllifin yaradıcılığı, poetik dünyası, şeirlərinin fəlsəfi mahiyyəti və müasir ədəbi prosesdəki yeri ətrafında geniş fikir mübadiləsi aparılıb.

Təqdimat mərasimi tanınmış qiraətçi Müşfiqə Baləddinqızının moderatorluğu ilə baş tutub. Tədbirdə ədəbiyyatşünaslar, alimlər, şairlər, jurnalistlər, qələm dostları, eləcə də hüquq-mühafizə orqanlarının sabiq əməkdaşları iştirak ediblər. Çıxışlarda Rafiq Ələkbərin yaradıcılığının müxtəlif istiqamətləri təhlil olunub, onun poeziyasında insanın daxili aləmi, mənəvi axtarışları, vicdan, ədalət və özünüdərk kimi mövzuların əhəmiyyəti önə çəkilib.

Tədbirdə çıxış edən filologiya elmləri doktoru Cavanşir Yusifli, iqtisad elmləri doktoru Əyyub Əyyubov, şair-tədqiqatçı Hikmət Məlikzadə və şair Xalidə Nuray müəllifin poetik irsinin ictimai-fəlsəfi mahiyyətindən, şeirlərindəki mistik-təsəvvüf çalarlarından və bu yaradıcılığın oxucuda oyatdığı duyğulardan bəhs ediblər. Onların fikirlərində Rafiq Ələkbər poeziyasının yalnız zahiri ifadə gözəlliyi ilə məhdudlaşmadığı, dərin məna qatları və mənəvi axtarışlarla səciyyələndiyi vurğulanıb.

Qeyd olunub ki, şairin poetik düşüncəsində insan və onun mənəvi dünyası xüsusi yer tutur. Həyatın mənası, vicdan qarşısında məsuliyyət, insanın özünə və cəmiyyətə münasibəti kimi məsələlər onun yaradıcılığında fərqli bədii çalarlarla ifadə olunur. Bu baxımdan, Rafiq Ələkbərin şeirləri oxucunu hazır qənaətlərlə kifayətlənməyə deyil, sözün alt qatına enməyə, düşünməyə və öz daxilində cavab axtarmağa sövq edir.

Azərbaycan Yazıçılar Birliyinin katibi Elçin Hüseynbəyli, Əməkdar jurnalist İlqar Rüstəmov, sabiq prokurorlar Ələmdar Məmmədov və İlham Məmmədov, eləcə də tanınmış jurnalist Şəmsəddin Şabiyev çıxışlarında şairin insani keyfiyyətlərindən, yüksək mənəvi dəyərlərindən və həyat mövqeyindən söz açıblar. Onlar Rafiq Ələkbərin şəxsiyyətindəki səmimiyyətin, paklığın, ədalət duyğusunun və mədəniyyətin onun yaradıcılığı ilə vəhdət təşkil etdiyini bildiriblər.

Çıxışlarda şairin Yardımlı təbiətinin saflığını xatırladan mənəvi dünyası, Savalan dağı kimi uca dəyərlərə bağlılığı xüsusi vurğulanıb. Onun keçmiş prokurorluq fəaliyyətində rəhbər tutduğu ədalətlilik prinsipinin, insanlara münasibətində nümayiş etdirdiyi məsuliyyətin poetik düşüncəsində də öz əksini tapdığı qeyd edilib. Bildirilib ki, Rafiq Ələkbərin poeziyasında söz yalnız duyğuların ifadə vasitəsi deyil, həm də insanı düşündürən, onu öz mənəvi dünyası ilə üz-üzə qoyan bir qüvvə kimi çıxış edir.
Təqdimat mərasimində müəllifin əsərlərinin xarici dillərə tərcüməsi məsələsinə də toxunulub. Filologiya üzrə fəlsəfə doktoru Kamran Nəzirli Rafiq Ələkbərin şeirlərini və “İnsan alveri” romanını ingilis dilinə çevirdiyini diqqətə çatdırıb. Bu fakt müəllifin yaradıcılığının Azərbaycan oxucusu ilə yanaşı, başqa dillərdə danışan oxuculara da çatdırılması baxımından əhəmiyyətli addım kimi dəyərləndirilib. Onun fikirlərində şairin misralarındakı fəlsəfi dərinliyin, incə məna çalarlarının və emosional yükün tərcümə prosesində qorunmasının vacibliyi ön plana çıxıb. Çünki poetik mətnin başqa dilə köçürülməsi yalnız sözlərin qarşılığını tapmaq deyil, həm də müəllifin düşüncə tərzini, hisslərini və bədii ifadə özünəməxsusluğunu çatdırmaq deməkdir. Bu baxımdan, Rafiq Ələkbər yaradıcılığının tərcüməsi onun poetik dünyasının daha geniş ədəbi mühitdə tanınması üçün mühüm imkan yaradır.
Professor Anna Barkutaşvili isə Rafiq Ələkbər şeirindəki fəlsəfi dərinliyi başqa dillərə axtararkən qarşılaşdığı duyğusal və bədii incəliklərdən danışıb.

Əməkdar jurnalist Şəmsiyyə Kərimova çıxışında müəllifin şeirlərini müasir ədəbi proses kontekstində təhlil edib. O, şairin yaradıcılığının bədii xüsusiyyətləri ətrafında fikirlərini bölüşüb.

Çıxışlar zamanı müxtəlif baxışların səsləndirilməsi tədbirin elmi-ədəbi məzmununu zənginləşdirib, müəllifin yaradıcılığına fərqli yanaşmaların ortaya qoyulmasına şərait yaradıb.

Mərasimin yaddaqalan məqamlarından biri də şairin əsərlərindən nümunələrin səsləndirilməsi olub. Qiraətçilər Müşfiqə Baləddinqızı və İsmayıl Etibarlının ifasında təqdim olunan misralar tədbirə xüsusi ovqat bəxş edib. Şeirlərin bədii ifadə ilə səsləndirilməsi poetik düşüncənin canlılığını iştirakçılara daha yaxından hiss etdirib.

Tədbirin sonunda çıxış edən şair Rafiq Ələkbər təqdimat mərasimində iştirak edənlərə, yaradıcılığı haqqında fikirlərini bölüşən alimlərə, şairlərə, jurnalistlərə və qələm dostlarına minnətdarlığını bildirib. Müəllif kitabını qələm dostlarına təqdim edərək onlarla yaradıcılıq əlaqələrinin və ədəbi ünsiyyətin əhəmiyyətini ifadə edib.

Ümumilikdə, “Bu qapı bəlkə tövbədir?” kitabının təqdimatı yalnız yeni nəşrin oxuculara təqdim olunması ilə məhdudlaşmayıb. Tədbir şairin yaradıcılığı ətrafında fikir mübadiləsinin aparıldığı, poeziyanın mənəvi missiyasının, sözün insan həyatındakı yerinin və ədəbiyyatın cəmiyyətlə əlaqəsinin müzakirə edildiyi əlamətdar ədəbi görüş kimi yadda qalıb.

Ədəbiyyatın əsas gücü insanı düşündürməkdə, onun duyğularına toxunmaqda və mənəvi dünyasında yeni suallar oyatmaqda üzə çıxır. Rafiq Ələkbərin yeni kitabının təqdimatı da müasir Azərbaycan poeziyasına, şairin yaradıcılığına və kitabın daşıdığı mənəvi-fəlsəfi məzmuna həsr olunmuş əlamətdar ədəbi görüş kimi diqqət çəkib.

• Nobel mükafatının məbləği artırıldı
• 2026-cı il "Buker" mükafatının qısa siyahısı açıqlandı
• Alim Qasımov: "Üzeyir Mehdizadə ilə duetimizin belə qarşılanacağını təxmin edirdim, ancaq..." - Müsahibə