Azərbaycan Televiziyasında yayımlanan Türkiyə istehsalı “Diriliş. Ərtoğrul” serialı artıq yekunlaşmaq üzrədir.

AzTv-nin Kulis.az-a verdiyi məlumata görə, Azərbaycan dilində yayımlanan serial kanalın reytinqində ilk pillədədir. Əvvəllər yalnız həftəiçi hər gün yayımlansa da, tamaşaçıların çoxsaylı xahişləri nəzərə alınaraq 6 gün efirə verilməyə başlayıb.

Serialın Ərtoğrul obrazını dublyaj edən Əməkdar artist Cəlal Məmmədovun sözlərinə görə, bəzən səkkiz saat bir bölümün dublyajı ilə məşğul olub: “Çünki Ərtoğrul hər səhnədə, hər bölümdə müxtəlif vəziyyətlərə düşürdü, bu da onun reaksiyalarını dəyişirdi. Gah sərt olurdu, gah mülayim... Bunu tamaşaçıya çatdırmaq lazım idi. Söhbət aktyor oyunundan getmir, tarixi şəxsiyyəti dublyaj etməkdən gedir. Seriala baxa-baxa xarakteri tutmaq özümə də ləzzət edirdi. Türk dünyasının böyük sərkərdəsini səsləndirmək mənim üçün böyük qürur oldu. Təxminən 8 saat dublyajla məşğul olurdum. Ən çox sözü olan obraz məndə idi”.
C.Məmmədov uğurlu dublyajın reytinqə ciddi təsir etdiyini düşünür:
“Bəzən qınayanlar olur ki, niyə türk dilini dublyaj etmisiniz. Əslində isə, bu, əski türk dilində idi, bəzi sözlər, ümumiyyətlə, anlaşılmırdı. Sözün mənasını axtarırdıq, dilimizə uyğunlaşdırırdıq. Serialın reytinqdə birinci olmasında uğurlu dublyaj 90 faiz rol oynayır. Mən də əlimdən gələni etdim ki, Ərtoğrulun xarakterini səsimlə çatdıra bilim. Kastinqdə məni seçdiyinə görə AzTV rəhbərliyinə və əməyi keçən hər kəsə təşəkkür edirəm”.

Daha sonra Əməkdar artist serial haqda danışarkən bəzi səhnələrdə həqiqətən ağladığını deyib:

“Mənə ən çox təsir edən səhnə ömür-gün yoldaşını itirməsi, onun dəfn olunması oldu. Seriala baxıb kövrəlməmək mümkün deyil. Bəzi səhnələrdə Ərtoğrul ağlayanda onu dublyaj edə-edə mən də ağlayırdım. Bu da filmin dublyajına xüsusi gözəllik verir”.

• Türkiyə musiqi sənayesində tarixi ilk
• İrlandiya və Niderland “Avroviziya”da iştirak etməyəcək – Səbəb
• Sədaqət, itaət və andın ciddiliyi... - Edmund Leytondan "Cəngavər əməli"