Budapeştdə yerləşən Azərbaycan Evində Azərbaycanın Xalq artisti Fəxrəddin Manafovla görüş təşkil olunub.

Kulis.az xəbər verir ki, mədəniyyət və incəsənət sahəsində mühüm əhəmiyyət daşıyan tədbir sənətsevərlər və diaspor nümayəndələri tərəfindən maraqla qarşılanıb. Görüşdə Macarıstanda yaşayan həmvətənlərimizlə yanaşı, Qazaxıstan, Özbəkistan və Gürcüstan respublikalarının səfirləri də iştirak ediblər.

Tədbiri Macarıstan Azərbaycan Evinin rəhbəri İbrahim Səfərli çıxış edərək Fəxrəddin Manafov kimi görkəmli sənətkarla görüşün xüsusi əhəmiyyətini vurğulayıb. O bildirib ki, bu kimi tədbirlər milli mədəniyyətin təbliği və gənclərin incəsənətə marağının artırılması baxımından mühüm rol oynayır, sənətkarın kino və teatr sahəsindəki töhfələri isə yeni nəsillər üçün ilham mənbəyidir.

Daha sonra Azərbaycanın Macarıstandakı səfiri Tahir Tağızadə çıxış edərək Fəxrəddin Manafovun zəngin yaradıcılıq fəaliyyətindən bəhs edib. Səfir sənətkarın Azərbaycan mədəniyyətinin inkişafı və beynəlxalq aləmdə tanıdılmasında mühüm rol oynadığını vurğulayıb. O qeyd edib ki, sənətkarın canlandırdığı obrazlar milli kino tarixində xüsusi yer tutur və onun yaradıcılığı peşəkarlıqla yanaşı, dərin mənəvi dəyərləri də əks etdirir.

Görüş Xalq artisti Fəxrəddin Manafovun təqdimatı ilə davam edib. Sənətkar iştirakçıların suallarını cavablandıraraq zəngin yaradıcılıq yolu, kino və teatr sahəsində qazandığı təcrübə, həmçinin mədəniyyətin cəmiyyətdəki rolu ilə bağlı fikirlərini bölüşüb. O, sənətə olan sevgi və sədaqətin uğurunun əsasını təşkil etdiyini bildirərək hər kəsə daim öz üzərində çalışmağı və milli dəyərlərə bağlı qalmağı tövsiyə edib.

Tədbir səmimi atmosferdə keçib və iştirakçılarda xoş, unudulmaz təəssüratlar yaradıb.

• Yeni həşərat cinsinə Teylor Sviftin adı verildi
• Tanınmış rejissor şəxsi əşyalarını Servantes İnstitutuna verdi - Səbəb
• Zorla evləndirilən 17 yaşlı qız necə xilas edildi?