Kanadalı dünya ulduzu Selin Dion 6 illik fasilədən sonra Parisdə verdiyi ilk tammiqyaslı konsertində duyğusal anlar yaşayaraq göz yaşlarına hakim ola bilməyib.

Kulis.az xəbər verir ki, bu barədə tanınmış komediya ustası Loni Lav (Loni Love) öz "İnstaqram" hesabında məlumat paylaşıb.

Uzun sürən fasilədən sonra yenidən səhnəyə qayıdan Dion konsert zamanı pərəstişkarlarına təsirli nitqlə müraciət edib. O, oxumağa yenidən başlaya bilməsində sevənlərinin dəstəyinin böyük payı olduğunu xüsusi vurğulayıb. Loni Lav müğənninin bu tarixi anını belə şərh edib: "O, qayıdacağına söz vermişdi... Selin Dion altı illik fasilədən sonra ilk konsertindəki emosional çıxışı zamanı ağlayaraq dedi: 'Mən qayıdacağıma dair verdiyim sözü tutdum... Mən nəyəmsə, hamısı sizin sevginiz sayəsindədir'".

Xatırladaq ki, 2022-ci ilin dekabrında sənətçiyə nadir nevroloji xəstəlik — "əzələ sərtliyi sindromu" (stiff-person syndrome) diaqnozu qoyulmuşdu. Bu, mərkəzi sinir sistemini zədələyən, əzələlərin idarəolunmaz və ağrılı spazmları ilə müşayiət olunan nadir autoimmun hərəkət pozğunluğudur.

Məhz bu ağır xəstəliyə görə sənətçi 2023-cü ildə planlaşdırılan dünya turnesini ləğv etmək məcburiyyətində qalmışdı. İfaçının bundan əvvəlki ən son çıxışı 2024-cü ildə Ər-Riyadda "Elie Saab" moda nümayişi çərçivəsində baş tutmuşdu. Parisdəki bu anşlaqlı konsertinə qədər isə aktrisa sonuncu dəfə tammiqyaslı şou ilə 2020-ci ildə pərəstişkarlarının qarşısına çıxmışdı.

Selin Dion kimdir?

Selin Dion (Céline Marie Claudette Dion; 30 mart 1968-ci ildə anadan olub) — kanadalı müğənni, bəstəkar və pop musiqisinin canlı əfsanəsidir. Fövqəladə güclü vokalı və texniki ustalığı ilə tanınan Dion, tarixdə ən çox albom satan musiqiçilərdən biridir (dünya üzrə 200 milyondan çox nüsxə). 1988-ci ildə İsveçrə təmsilçisi kimi "Avroviziya" mahnı müsabiqəsinin qalibi olaraq beynəlxalq şöhrət qazanıb. "My Heart Will Go On" (məşhur "Titanik" filminin saundtreki), "The Power of Love", "All by Myself" və "Because You Loved Me" kimi ölməz hitləri ilə dünya musiqi tarixinə adını qızıl hərflərlə yazdırıb. O, karyerası ərzində "Qremmi", "Oskar" və "Qızıl Qlobus" daxil olmaqla onlarla ən ali musiqi və kino mükafatlarının sahibidir.

• Tanınmış fotoqrafın sərgisi nümayiş olunacaq
• "İnanmasan, olmalı olan əsla olmayacaq..." - Xulio Kortasarın "Xana- xana oyunu" romanından bir hissə
• Türk dünyası özünü yenidən xatırlayır... - Tarixi səfər