Məşhur rus rejissor Andrey Zvyaqintsev Rusiya Ədliyyə Nazirliyi tərəfindən "xarici agentlər" siyahısına daxil edilib.

Kulis.az xəbər verir ki, kinematoqrafçının adı artıq qurumun müvafiq reyestrində yer alıb.

Əsas məqam odur ki, rejissorun adı "qara siyahı"ya onun "Minotavr" filminin Fransa tərəfindən "Ən yaxşı beynəlxalq film" kateqoriyasında "Oskar" mükafatına rəsmi namizəd göstərilməsindən cəmi bir gün sonra salınıb.

Qeyd edək ki, Zvyaqintsev 2022-ci ildən etibarən Rusiyanı tərk edərək Fransada yaşayır.

19 may 2026-cı ildə 79-cu Kann Kino Festivalında premyerası baş tutan "Minotavr" filmi festivalın əsas mükafatlarından olan Qran-prini, eləcə də "Ən yaxşı saundtrek" mükafatını qazanıb. Ekran işi Şarl Jiliberyanın "CG Cinéma" və "MK Productions" fransız şirkətləri ilə müştərək istehsal olunub.

Xatırladaq ki, ötən il də Fransa oxşar addım ataraq iranlı rejissor Cəfər Pənahinin Kann Kino Festivalında "Qızıl palma budağı" qazanan və "Oskar"a namizəd göstərilən "Bu, sadəcə təsadüf idi" filmini ölkənin rəsmi namizədi kimi irəli sürmüşdü.

Andrey Zvyaqintsev kimdir?

Andrey Zvyaqintsev (Andrey Zvyagintsev) — müasir Rusiya kinosunun beynəlxalq səviyyədə ən çox mükafat qazanan və nüfuzlu kinorejissorlarından biridir. O, "Qayıdış", "Sürgün", "Yelena", "Leviafan" və "Sevgisizlik" kimi şedevrləri ilə Kann, Venesiya və digər böyük kino festivallarında ən ali mükafatlara layiq görülüb, eləcə də dəfələrlə "Oskar"a namizəd olub. Rejissorun əsərləri sosial reallıqlara kəskin tənqidi yanaşması ilə seçilir. Son illərdə siyasi mövqeyinə və müharibə əleyhinə çıxışlarına görə ölkəsindən mühacirət edərək fəaliyyətini Fransada davam etdirir.

• Şəhid valideyninin adını pis işlərdə görmək istəmirəm
• İsa İsmayılzadənin oğlu: "Xalq yazıçısının şeirlərini çap etmədi, dedi ki, kimə istəyirsiniz, şikayət edin" - Müsahibə
• "Onun yaradıcılıq eşqi yaşamaqda davam edir..." - Nəriman Həsənzadənin xatirəsinə