"Üzüklərin hökmdarı: Qollumun ovu" (The Lord of the Rings: The Hunt for Gollum) filminin rejissoru Endi Serkis ekran işinin aktyor heyətində irqi müxtəlifliyin olmamasına dair səsləndirilən tənqidlərə kəskin cavab verib.

Kulis.az xəbər verir ki, bu barədə "Variety" nəşri məlumat yayıb.

2014-cü ildən bəri Con Ronald Ruel Tolkinin əsərləri əsasında çəkilən ilk filmdə Ceymi Dornan, Anya Teylor-Coy, Keyt Uinslet, Li Peys və Leo Vudall kimi məşhurların iştirak edəcəyi məlumdur.

Bununla yanaşı, orijinal "Üzüklərin hökmdarı" trilogiyasının ulduzları – Elayca Vud (Frodo), İen MakKellen (Qendalf) və Endi Serkis (Qollum) öz rollarına qayıdacaqlar. Aktyor heyətinə yeni qatılan sənətçilərin isə daha sonra ictimaiyyətə açıqlanacağı bildirilir.

Rejissor Endi Serkis irqi müxtəlifliklə bağlı təzyiqlərə cavab olaraq filmin orijinallığına sadiq qalacaqlarını vurğulayıb:

"Düşünmürəm ki, biz sadəcə kastinq xatirinə və hansısa planların doldurulmasına quş qoymaq məqsədilə filmin siyasi cəhətdən korrekt versiyasını çəkək".

O əlavə edib ki, Tolkin özü Skandinaviya mifologiyasının güclü təsiri altında olub və bu amil onun kitablarında birbaşa öz əksini tapıb:

"Şayr (The Shire) tipik bir ağdərili icmasını xatırladır... Onlar ölkə hüdudlarından kənarda nələrin baş verdiyi ilə o qədər də maraqlanmırlar, lakin tam əmindirlər ki, yadelliləri öz aralarına buraxmaq istəmirlər".

"Qollumun ovu" filminin hadisələri "Hobbit" və orijinal "Üzüklərin hökmdarı" arasındakı dövrü əhatə edəcək. Ekran işi Piter Ceksonun "Üzük qardaşlığı" filmindən əvvəlki illərdə Qüdrət Üzüklərindən birini ələ keçirmiş Qollumun axtarışlarına həsr olunacaq. İddialı layihənin premyerası 17 dekabr 2027-ci ilə təyin edilib.

Xatırladaq ki, bir müddət əvvəl rejissor Piter Cekson Kann kinofestivalında kinematoqrafiyaya verdiyi töhfələrə görə Fəxri "Qızıl Palma Budağı"na layiq görülüb. "Üzüklərin hökmdarı" trilogiyasının yaradıcısına bu mükafatı məhz aktyor Elayca Vud təqdim edib.

• "Hərdənbir Kürdəmirdən də ötə gərək adam..." - Ələkbər Salahzadənin anım gününə
• "Satın alınması mümkün olmayan qadınlar adama çox baha başa gəlir..." - Fransua Moriak
• Azadlıq quşu - Aron Tamaşinin hekayəsi