Fransız kinosunun ulduzu İzabel Yüpper Busan Beynəlxalq Kino Festivalında süni intellekt (Sİ) tərəfindən hələ kənarlaşdırılmadığını, lakin tezliklə ekranda koreya və yapon dillərində danışa biləcəyi barədə şayiələr eşitdiyini bildirib.

Kulis.az xəbər verir ki, aktrisa bu barədə festivalın "Qala Təqdimat" bölməsində nümayiş olunan, rejissor Mark Fitussinin "Korrin haqqında hər şey" (All About Corinne) komediyasının mətbuat konfransında danışıb.

Süni intellekt təhlükəsi: "Vinil" valların qayıdışı

"Koreya dilində danışdığımı bilmirdim. Sadəcə 'anyonqhaseyo' (salam) deməyi bilirəm", – deyə Yüpper zarafat edib.

Süni intellektin aktyorluq peşəsini məhv edib-etmədiyi ilə bağlı suala aktrisa belə cavab verib: "Hələ ki, mən özüm oynayıram. Ona görə də bu qorxulu ehtimalla hələ üz-üzə gəlməmişəm. İndiyə qədər ekrandakı öz üzümdür və ümid edirəm ki, bu, belə də davam edəcək".

Yüpper Sİ-nin nəzəri cəhətdən təhlükə olduğunu qəbul etsə də, bunu kinoteatrların yoxa çıxacağı və ya vinil valların öləcəyi ilə bağlı keçmiş qorxulara bənzədib (hansı ki, sonradan yenidən dəbə mindilər): "Bəlkə də optimist olmaqda yanılıram, bilmirəm".

Aktrisa mətbuat konfransında həmçinin, gələn il məşhur italyan qorxu kinosu ustası Dario Arcentonun yeni filmində çəkiləcəyini də təsdiqləyib.

Kütləvi səhnə aktrisası və kino sənayesinin qəddarlığı

Mətbuat konfransında iştirak edən rejissor Mark Fitussi Yüpperlə artıq dördüncü dəfədir əməkdaşlıq etdiyini xatırladıb. O, Coan Kroufordun iştirakı ilə çəkilmiş köhnə bir filmin Yüpperlə remeykini çəkmək arzusunda olduğunu gizlətməyib. Hətta bir müddət əvvəl Yüpperin yük maşını sürücüsü rolunu oynayacağı bir ssenariyə başladığını, lakin Jülyet Binoşun oxşar rolda çəkildiyini öyrəndikdən sonra işi dayandırdığını, lakin gələcəkdə bu ideyaya qayıda biləcəyini bildirib.

İlk dəfə Lokarno festivalında nümayiş olunan "Korrin haqqında hər şey" filmində Yüpper aktrisa olmaq xəyalından heç vaxt əl çəkməyən təcrübəli kütləvi səhnə aktrisası (ekstra) Korrin Maklu obrazını canlandırır. Ekran işində Sandrin Kiberlen və digər tanınmış aktyorlar özlərini oynayırlar.

Yüpper kütləvi səhnə ifaçısını oynamağa necə yanaşdığı barədə deyib ki, bu, hər hansı digər peşə kimi sadəcə bir işdir. Lakin o, filmin aktyorluq peşəsinə yalnız isti münasibət bəslədiyi fikri ilə razılaşmayıb: "Kino sənayesi dərin iyerarxik cəmiyyətin bir nümunəsidir. Təbii ki, bu, gücü olanlarla olmayanların olduğu hər hansı bənzər təşkilata aiddir. Bir çox situasiyalarda bu sənayenin özünəməxsus qəddarlığı var".

Nobel laureatı Han Kanqla bağlılıq

Qeyd edək ki, İzabel Yüpper mətbuat konfransı üçün Busana gəlməzdən əvvəl Seulda Nobel mükafatı laureatı, cənubi koreyalı yazıçı Han Kanqın romanının xüsusi oxunuşunda iştirak edib. Busana üçüncü dəfə səfər edən Yüpper, eyni zamanda, bu il dünyanın ən böyük kino arxivlərindən biri olan "Fransa Sinemateki"nin (Cinémathèque Française) ilk qadın prezidenti seçilərək tarixə düşüb.

İzabel Yüpper və "Fransa Sinemateki"nin ilk qadın prezidenti

Avropa kinosunun canlı əfsanəsi hesab olunan İzabel Yüpper Kann, Berlin və Venesiya kimi dünyanın ən böyük kino festivallarında ən çox mükafat qazanan aktrisalardan biridir. O, təkcə Fransa kinosunda deyil, beynəlxalq layihələrdəki fəaliyyəti ilə də diqqət çəkir. Aktrisanın 2024-cü ildə Parisdə yerləşən, dünya kino tarixinin ən böyük və nüfuzlu arxiv mərkəzlərindən biri olan "Cinémathèque Française"ə (Fransa Sinemateki) rəhbər seçilməsi tarixi hadisə hesab olunur. Çünki 1936-cı ildə qurulan bu nəhəng instituta indiyədək heç vaxt qadın rəhbərlik etməmişdi. Yüpperin bu posta gətirilməsi onun kinematoqrafiyaya verdiyi yarım əsrlik töhfənin ən ali etirafı kimi qiymətləndirilir.

• Gənc Tamaşaçılar Teatrında “Qodo həsrətində” tamaşanın premyerası
• Van gölünün dərinliklərində qədim tikili aşkarlandı
• 2026-cı il "Buker" mükafatının qısa siyahısı açıqlandı