Amerikalı aktyor, məşhur "Sevimli yalançılar" serialının ulduzu Kiqen Allen Los-Ancelesdə silahlı basqına məruz qalıb.

Kulis.az xəbər verir ki, 37 yaşlı sənətçi bu barədə özünün "İnstaqram" səhifəsində məlumat paylaşıb.

Aktyorun sözlərinə görə, ərzaq mağazasının qarşısında maskalı iki nəfər ona hücum edərək həyatını təhlükəyə atıb və saatını tələb edib.

"Bu iki şəxs başıma zərbə endirdi, üstümə tapança və bıçaq çəkdi, sonra isə qaçıb gizləndilər. Onlar maskada idilər və mənim saatımı apardılar", – deyə Allen dəhşətli anları izləyiciləri ilə bölüşüb.

Hadisə yerindəki müşahidə kameralarının lentə aldığı görüntülərdə maskalı iki şəxsin mağazanın dayanacağında əşyalarını avtomobilinin baqajına yığan Allenə yaxınlaşdığı görünür. Soyğunçulardan biri tapança ilə aktyorun başına bir neçə zərbə endirib, digəri isə onu tutaraq bıçaqla hədələyib.

Cinayətkarlar aktyorun bahalı saatını aparsalar da, onun yaralanmış qolundakı qolbağı və üzüyünü çıxarmayıblar. Başından aldığı ağır zərbələrə görə beyninin silkələnməsindən şübhələnən sənətçi tibbi yardım üçün xəstəxanaya müraciət edəcəyini bildirib.

Los-Ancelesdə məşhurlara qarşı artan "saat ovu"

Kiqen Allen bütün dünyada gənclər arasında böyük populyarlıq qazanan "Sevimli yalançılar" serialındakı Tobi Kavano rolu ilə tanınır. Lakin onun başına gələn bu dəhşətli hadisə Los-Ancelesdə son illər məşhurlara qarşı artan cinayət dalğasının sadəcə bir epizodudur. Xüsusilə "Roleks" və "Patek Filipp" kimi lüks saat brendlərini hədəf alan mütəşəkkil qruplar tez-tez Hollivud ulduzlarını izləyir və onlara ictimai yerlərdə, restoran çıxışlarında və ya dayanacaqlarda silahlı basqın edirlər. Bu təhlükəli tendensiya bir çox tanınmış simaların ictimai yerlərdə bahalı aksesuarlar taxmaqdan imtina etməsinə və ya xüsusi mühafizəçilər tutmasına səbəb olub.

• "Aşiq olmaqdan özümü saxlaya bilmirəm..." - "Can't help falling in love" necə yarandı?
• İspaniya “Oskar” namizədini seçdi
• Teatral işıqda İsanın cansız bədəni – Karavacconun “Məsihin dəfni” tablosu