Azərbaycan Yazıçılar Birliyində (AYB) "Ulduz" jurnalının İmadəddin Nəsimiyə həsr olunmuş sayı təqdim olunub.

ONA-nın məlumatına görə, jurnalın baş redaktoru Qulu Ağsəs 2019-cu ilin Azərbaycanın böyük şairi İmadəddin Nəsiminin adı ilə bağlı olduğunu vurğulayıb: “Ulduz" jurnalının aprel sayını Nəsimiyə həsr etmək qərarına gəldik. Jurnalın bu nömrəsini Abid Tahirli ilə bir yerdə çap etmişik. Kitabda alimlərimizin Nəsimi haqqında məqalələri yer alır".

AYB sədri Anar çıxışında bildirib ki, jurnalda Nəsimi haqqında müxtəlif səpkili yazılar verilib: "Arzu edirəm ki, digər yazıçılarımız barədə də bu cür nömrələr buraxılsın".

"Ulduz" jurnalının aprel sayından məsul Abid Tahirli jurnalda dərc olunan məqalələrin Nəsimi yaradıcılığının Azərbaycan dili və ədəbiyyatına təsirindən bəhs etdiyini qeyd edib.

Tənqidçi İradə Musayeva Nəsiminin məktəb dərsliklərində hələ də ateist şair kimi tədris olunması fikrini səsləndirib: "Təəssüf ki, Nəsimiyə sovet dövründə olan münasibət dəyişməyib. İnanıram ki," Nəsimi ili" çərçivəsində onun yaradıcılığına həsr olunmuş məqalələrin sayı daha çox olacaq".

Sonra Azərbaycan Milli Elmlər Akademiyası (AMEA) M. Füzuli adına Əlyazmalar İnstitutunun direktor müavini Paşa Kərimov, (AMEA) İ.Nəsimi adına Dilçilik İnstitutunun əməkdaşı Qüdsiyyə Qəmbərova, fəlsəfə elmləri doktoru Rahib Ulusel, yazıçı Seyran Səxavət və başqaları çıxış ediblər.

Daha sonra "Ulduz" jurnalı və "Vektor" Beynəlxalq Elmlər Akademiyasının İmadəddin Nəsiminin 650 illik yubileyi ilə əlaqədar keçirdiyi poeziya müsabiqəsinin qalibləri mükafatlandırılıb. Müsabiqədə üçüncü yerin qalibi Ruslan Dostəli, ikinci yerin qalibi Firdovsi Rəsul, birinci yerin qalibi isə Emin Piri olub.

• Türkiyədə 2400 illik məzar tapıldı
• "Hə də, sizə hər şeyi deyiblər..." - Səlim Babullaoğlunun "Xatırladıqlarım" silsiləsindən I yazısı
• Beynin doğum sancıları - Racu Şıxlının hekayəsi