Azərbaycan Respublikasının Mədəniyyət Nazirliyi, Azərbaycan Televiziyası və "EMEDIA GROUP" Media Təşkilatının birgə təşkilatçılığı ilə milli teatr və kino tarixinin əfsanəsi, Xalq artisti, Dövlət mükafatı laureatı, “Şərəf” və “Şöhrət” ordenli, Bakı Bələdiyyə Teatrının yaradıcısı Amaliya Pənahovanın 80 illik yubileyinə həsr olunmuş “Unuda Bilmirəm. Amaliya Pənahova” bədii sənədli filminin təqdimat mərasimi keçirilib.

Kulis.az xəbər verir ki, Nizami Kino Mərkəzində təşkil edilən mərasimdə rəsmi qonaqlar, mədəniyyət xadimləri, ictimaiyyət nümayəndələri, tanınmış sənət adamları və digərləri iştirak ediblər.

Təqdimatda Azərbaycan Dövlət Film Fondunun direktoru Cəmil Quliyev, xalq artistləri Nurəddin Mehdixanlı və Həmidə Ömərova, ekran əsərinin ideya müəllifi "EMEDIA GROUP" Media Təşkilatının sədri Elşən Əliyev, ssenari müəllifi Ülviyyə Heydərova, rejissor Şəlalə Hüseynova Amaliya Pənahovanın yaradıcılığını əhatə edən çıxışlar edib, sənətkar haqqında fikirlərini bildiriblər.

Filmin yaradıcı heyəti də təqdimatda çıxış edərək Amaliya Pənahova kimi geniş yaradıcılığa malik bir aktrisa haqqında film çəkməyin necə böyük məsuliyyət hissi olduğunu vurğulayıblar.

Daha sonra film nümayiş olunub və tamaşaçılar tərəfindən böyük maraqla qarşılanıb.

Qeyd edək ki, Azərbaycan Televiziyasının Kinoproqramlar redaksiyasında istehsal olunan filmdə Xalq artistinin yaradıcılığını əhatə edən məqamlara, zəngin yaradıcılıq yoluna nəzər salınıb, aktrisanın səhnəyə gəlişindən ömrünün son günlərinə qədər olan fəaliyyəti - Bakı Bələdiyyə Teatrını yaratması, özünün quruluş verdiyi tamaşalar, rejissor kimi həyata keçirdiyi tədbirlər, ümumiyyətlə, mədəniyyət və ictimai xadim kimi gördüyü işlər əks olunub. Bundan başqa, filmdə Xalq yazıçısı Anar, Xalq artistləri Rasim Balayev, Hacı İsmayılov, Mərahim Fərzəlibəyov, akademik Rafael Hüseynov, Əməkdar incəsənət xadimi Məryəm Əlizadə sənətkarla bağlı xatirələrini bölüşüblər.

• Britaniya 71 milyonluq Rembrandt tablosunun ölkədən çıxarılmasına qadağa qoydu
• "Sağalırlarsa, Məryəm Ananın mərhəmətidir, ölərlərsə, bizim günahımızdır..." - İtalyan yazıçıdan sitatlar
• "İçərişəhər” Dövlət Tarix-Memarlıq Qoruğu İdarəsinin yeni strukturu müəyyənləşdi