Ədalət Əsgəroğlu “Ədəbiyyat qəzeti”ni yarı yolda qoydu

Ədəbi tənqid

Ana səhifə
Ədəbi tənqid

Ədalət Əsgəroğlu “Ədəbiyyat qəzeti”ni yarı yolda qoydu

23 aprel 2011

13:47

“Ədəbiyyat qəzeti” və onun baş redaktoru Ayaz Vəfalının ətrafında söz-söhbətlər səngimək bilmir. AYB rəhbərindən tutmuş, qurumun gənc ədiblərinə qədər bütün hamı qəzet və Ayaz Vəfalıdan narazıdır.
Narazılığın əsas səbəbi “Ədəbiyyat qəzeti”nin müasir zamanla uzlaşmamasıdır. Elə bu iddialarla çıxış edən daha bir neçə gənc yazar yenidən “Kulis.az”-da məlum problemi qabardıblar. Tanınmış şair Vaqif Səmədoğlu isə daha dərinə gedərək “Hamı qəzet haqda eyni şeyi deyir” deyib.

Kulis.az açıqlamalarında daim “Ədəbiyyat qəzeti”ni müdafiə edən şair və AYB-nin mətbuat xidmətinin rəhbəri Ədalət Əsgəroğluna müraciət edərək həm Vaqif Səmədoğlunun, həm də gənc yazarların iddialarının nə dərəcədə həqiqətə uyğun olub-olmadığını öyrənmək istədik.

Lakin mövzunu öyrənən Ə. Əsgəroğlu “mən artıq bu mövzu haqqında danışmaq istəmirəm” dedi. O, danışmağa borclu olduğunu bildirsə də, “məni düz başa düşün, şəkərim var, ürəyim ağrıyır, həqiqəti deyəndə çoxlarının xoşuna gəlmir” deyə əlavə etdi. Ə. Əsgəroğlu söhbətini “Həqiqəti deyirəm düz anlamırlar. İstəmirəm daxilimdə o adamlara qarşı ikrah hissi yaransın (“Ədəbiyyat qəzeti”ni tənqid edənləri nəzərdə tutur – V.Q). Əgər bu baş qaldırsa, gərək tərki-dünya olam. Amma mən əsəbiləşmək istəmirəm, onsuz da səhhəttim qaydasında deyil” deyə tamamladı.

Xatırladaq ki, Ə. Əsgəroğlu hələ “Ədəbiyyat qəzeti” ətrafında söz-söhbətlər bu dərəcədə böyük miqyas almamış “Kulis.az”-a açıqlama verib qəzeti tənqid edən AYB sədrini ciddiyyətə çağırmışdı. Görünür bu cəsarətli çağırışından sonra ona qarşı olan təzyiqlər nəticəsində “şəkər” və “ürək ağrıları” baş qaldırıb.

Vüqar Qurdqanlı