Bu gün görkəmli italyan bəstəkarı Antonio Vivaldinin anım günüdür.

Kulis.az bu münasibətlə musiqiçi haqqında maraqlı faktları təqdim edir.

Antonio Luço Vivaldi Barokko dövrünün görkəmli bəstəkarı, virtuoz skripkaçısı, müəllimi və katolik rahibidir. O, instrumental musiqiyə, xüsusilə solo konsert janrına gətirdiyi yeniliklərlə musiqi tarixini dəyişdirib, İohan Sebastyan Bax kimi nəhəng bəstəkarlara dərindən təsir edib.

Vivaldi Venesiyada anadan olub. Saçlarının rənginə və keşişlik rütbəsinə görə onu doğma şəhərində “Qırmızı rahib" adlandırırdılar. Lakin xroniki tənəffüs xəstəliyi (ehtimal ki, ağır astma) səbəbindən kilsədə ibadətləri idarə etməkdə çətinlik çəkirdi. Elə bu səbəbdən də kilsə işlərindən uzaqlaşaraq diqqətini tamamilə musiqiyə yönəltdi.

O, 30 ildən çox Venesiyadakı kimsəsiz qızlar pansionatında (Ospedale della Pietà) kapelmeyster və bəstəkar kimi çalışıb. Vivaldinin rəhbərliyi altındakı bu məktəb orkestri tezliklə Avropanın ən məşhur musiqi kollektivlərindən birinə çevrilir. Bəstəkar özünün ən məşhur konsertlərini və operalarının böyük hissəsini məhz bu yetim qızlar ansamblı üçün bəstələmişdi.

Vivaldi 500-dən çox konsert, 40-dan çox opera və xeyli sayda dini musiqi əsəri yazıb. 1725-ci ildə nəşr olunan və dörd skripka konsertindən ibarət "İlin fəsilləri" silsiləsi isə onun yaradıcılığının zirvəsidir. Vivaldi sadəcə musiqi yazmırdı; o, hər fəslə aid sonetlər qələmə alaraq quşların oxumasını, yay fırtınasını, buz üstündə sürüşən insanları skripka simlərində möcüzəvi şəkildə canlandırırdı.

Bundan əlavə, o, solo konsertin klassik “sürətli - yavaş - sürətli” (3 hissəli) strukturunu təkmilləşdirərək bütün dünyada dəbə salıb.

Yaradıcılığının çiçəkləndiyi dövrdə bütün Avropa zadəganları tərəfindən alqışlanan Vivaldi, ömrünün sonlarına yaxın dəbdən düşür. Yeni musiqi üslublarının yaranması ilə onun əsərlərinə maraq azalır. 1740-cı ildə maddi sıxıntılar içində Avstriya imperatoru VI Karlın dəstəyini almaq ümidi ilə Vyanaya köçür. Lakin imperatorun qəfil ölümü bəstəkarı tamamilə çarəsiz qoyur.

O, 1741-ci ildə Vyanada yoxsulluq və tənhalıq içində vəfat edir, kimsəsizlər qəbiristanlığında dəfn olunur.

Vivaldinin adı 150 ildən çox müddətdə demək olar ki, heç yerdə xatırlanmır. Yalnız XX əsrin əvvəllərində (xüsusilə 1920-30-cu illərdə) əlyazmalarının tapılması ilə dünya Vivaldi dahiliyini yenidən kəşf edir.

Bu gün Antonio Vivaldi dünyada ən çox dinlənilən klassik musiqi bəstəkarlarındandır. Onun "İlin fəsilləri" silsiləsi kinofilmlərdən tutmuş rəqəmsal platformalara qədər ən çox ifa olunan əsərlərdəndir. Maks Rixter kimi müasir bəstəkarlar isə bu əsəri neoklassik üslubda yenidən işləyərək dövrümüzün klassik hitinə çeviriblər.

• "Unutqanlığın ağır pəncəsi üstünüzdən keçəcək..." - Yuliya Sendreinin şeiri
• Əməkdar artist komaya düşdü
• "Ölüm yalnız ürəyin dayanması deyil" - "Şeytan əməli" haqqında