"Hardasa, hardasa ilğıma dönmək..."

Poeziya

Ana səhifə
Poeziya

"Hardasa, hardasa ilğıma dönmək..." - Günel Eminli

9 iyun 2026

11:50

Bu gün yazıçı, şair Günel Eminlinin anım günüdür.

Kulis.az onun "Hardasa lap uzaqlarda..." şeirini təqdim edir.

Hardasa lap uzaqlarda...
Göylə yerin birləşdiyi,
Atlantın günah mələyi kimi
Səmanı çiynində daşıdığı yerdə,
Uzun uzun yağışlar yağar,
Bax, o yağışların yuxusuna girmək...

Hardasa, ağacsız, çaysız,
Çöl bir kənddə,
Çirkli pəncərəli bir evdə,
Qoca dəstəmazsız namazını qılır,
Üzünü səhv tutduğu qibləsinə,
o qocanın düz qibləsi olmaq...

Hardasa uşaq evində,
“dedovşina” ,
Yekəpər biri, özündən balacanın,
Yeməyinə tüpürüb, “bunu ye”
əmrinə verəndə,
o balacanın yekəpərə qaytardığı
yağlı söyüş olmaq...
Hardasa lap yaxınlarda,
Kasıb bir atanın,
İşıqlı vitrinli maqazindən,
Balasına oyuncaq almaq üçün,
əlini cibinə atdığında ,
pulunun çatmayan qəpiyinə dönmək...

Hardasa, hardasa,
Uzaqlarda, yaxınlarda
Uzun uzun yağışlar yağar,
O yağışların yuxusuna girmək,
Kimin üçün yağdığını bilmək,
Və ilğıma dönmək...