Gürcüstanın gələn ilin dövlət büdcəsindən Tbilisidə fəaliyyət göstərən Mirzə Fətəli Axundov adına Azərbaycan Mədəniyyəti Muzeyi və Heydər Əliyev adına Tbilisi Dövlət Peşəkar Azərbaycan Dram Teatrı üçün ayrılacaq vəsaitin həcmi məlum olub.

Kulis.az APA-ya istinadən xəbər verir ki, Gürcüstanın 2026-cı il üçün dövlət büdcəsi layihəsinə əsasən, növbəti il üçün muzeyə 78 min lari (49 min AZN), teatra isə 377 min lari (236,5 min AZN) həcmində vəsait ayrılacaq.

Hər iki mədəniyyət ocağı üçün nəzərdə tutulan vəsaitlərin həcmi 2025-ci ildə ayrılmış vəsaitlərdən çoxdur. Belə ki, builki dövlət büdcəsindən muzeyə ayrılmış dövlət vəsaiti 64 min lari, teatr üçün isə 318 min lari təşkil edir.

Muzey dövlət vəsaitinin 50 min larisini maaşların ödənilməsinə yönəldəcək, 28 min larini isə qanunla icazə verilən xidmətlər əsasında əldə edə biləcək.

Teatr isə dövlət vəsaitinin 356 min larisini əməkhaqlarının qarşılanması üçün istifadə edəcək. Mədəniyyət ocağı il ərzində qanunvericiliyə uyğun xidmətlər əsasında 20 min lari həcmində gəlir əldə etmək hüququna malik olacaq. Digər xərclər üçün isə min lari nəzərə tutulub.

Büdcə layihəsində Petros Adamyan adına Tbilisi Dövlət Erməni Dram Teatrına ayrılması planlaşdırılan dövlət vəsaitinin həcmi 906 min lari (568,3 min AZN) təşkil edir. Bu rəqəm 2025-ci ilin dövlət büdcəsində 752 min lari olub. Gələn il üçün vəsait illik müqayisədə 20,4% çox olmaqla yanaşı, Azərbaycan teatrı üçün ayrılacaq dövlət vəsaitini 2,8 dəfə üstələyir.

Qeyd edək ki, hazırda layihə Gürcüstan parlamentində komitələr formatında müzakirə olunur. Sənədin oktyabrın 14-də hökumətə təqdim olunacağı gözlənilir. Daha sonra layihə düzəlişlərlə birgə parlamentin sessiya iclaslarında müzakirələrə çıxarılacaq.

• "Balkan ədəbiyyatının Qorkisi" - Hansı məşhur yazıçı onu ölümdən qurtarmışdı?
• Məşhur repçi qətl şübhəsi ilə həbs edildi
• Maqsud İbrahimbəyovun kitabının təqdimatı olacaq