"Rus dilinin bizə verdiyi xeyri unuda bilmirəm. Ədəbiyyatı çıxardıb dünya ədəbiyyatına. Bu dilin Azərbaycan ədəbiyyatına xidmətlərini yaddaşımdan çıxarda və unuda bilmərəm. Ona görə də "rus sektorlarının" bağlanmasının qəti əleyhinəyəm..."

Bu sözləri Kulis.az-ın "Rus sektorları" bağlanmalıdırmı?" sualına cavab verən yazıçı Əkrəm Əylisli deyib.

"Mən belə fikirləşirəm ki, hər şeyi bağlamaq asandır. Qapıları bağlamaq asandır, darvazaları bağlamaq asandır, hər şeyi bağlamaq asandır. Açmaq çətindir. Bilirsən, ziyanı nə ola bilər... Məsələ budur ki, mən bir vaxtlar Maqsud İbrahimbəyovla qanlı-bıçaqlı davada idim rus dilində yazdığı üçün. Rus dilində yazanlarla dalaşırdım. Deyirdim, heç olmasa utanın ki, Tolostoy var. Tolostoy da yazıb o dildə. Siz də yazırsız. Heç olmasa biraz sıxıntı çəkin bundan. Amma sonra gördüm ki, bu dildə yazanlar əgər Azərbaycan həyatından, Azərbaycan xalqının taleyindən yazırlarsa, bu da məqbuldur. Rus dilində yazsın, hansı dildə yazır yazsın. Məqbuldur. Rus dilini guya Azərbaycan dilindən zəif hesab edənlər də var. Bu əxlaqın sahibləri, sadəcə, millətimizi gözdən salır".

Onun sözlərinə görə, rus dilində təhsil alanlar folkloru, xalqın mənəviyyatını duya bilmirlər.

"Mən bu fikirdəyəm ki, Rusiya ilə əlaqələrimizin müsbət tərəflərini saxlamalıyıq. Məsələn, rusca oxuyan uşaq Azərbaycan həyatına azərbaycanca oxuyan uşaq qədər bağlı ola bilməz. Mənim üçün insanın ali keyfiyyətlərindən biri də onun xalq ədəbiyyatına bağlı olmağıdır. Rusca təhsil alanlar heçvaxt folklora, xalqın dərin mənəviyyatına bağlı ola bilmir. Demək, burada böyük bir problem yaranır. Faktiki problemdir..."

Yazıçı "Dediniz, rusca təhsil alanlar Azərbaycan mədəniyyətini, folklorunu duymur. O zaman "rus sektoru" bağlansa daha yaxşı olmazmı? Belə olsa, öz mədəniyyətimizə, öz kökümüzə bağlı adamlar yetişər, yox?" sualına isə belə cavab verib:

"Yəni, folklordan uzaqlaşan adam zamanla Azərbaycan mənəviyyatından da uzaqlaşmış olur. Amma unutmayaq, axı o həm də nəsə qazanır... Onun qazandıqlarını faydalı istiqamətdə istifadə etməyi üçün çalışmaq lazımdır. Mən Azərbaycan dilində təhsil almışam. Sonradan - Moskvada Ədəbiyyat İnstitutunda Rus dilini kamil öyrəndim. Rusdilli əsərlərlə, bir növ, dialoq qurmağa başladım, onlarla ünsiyyətə girdim, "nə var, nə yox?" öyrəndim. Çox şey qazandım, oxudum, yazdım. Öyrəndiklərim mənə ilham verdi ki, Azərbaycan dilində gözəl mətnlər yaradım. Ancaq folklorumuzdan, mahiyyətimizdən uzaqlaşmadım. Yəni, folklordan uzaqlaşan adam zamanla Azərbaycan mənəviyyatından uzaqlaşır, amma həm də nəsə qazanır... Onun qazandıqlarını faydalı istiqamətdə istifadə etməyi üçün çalışmaq lazımdır".

• Türkiyəli məşhur müğənni vəfat etdi
• "Daxilən şahzadə qala bilmək əsl qələbədir..." - İngilis yazardan sitatlar
• Səbinə Hacıyeva: "Azərbaycan maddi və qeyri-maddi mədəni irsin qorunmasına xüsusi əhəmiyyət verir"