Son vaxtlar dünya koronavirusdan əziyyət çəkir. İnsanlar xəstəliyə tutulur, dünyalarını dəyişir. Ölkəmizdə də virusa tutulan şəxslər var. Qələm adamları virusdan necə qorunur, tədbirlər alırmı? Kulis.az bu barədə yazıçıların münasibətini öyrənib. Cavabları təqdim edirik.

Anar

Xalq yazıçısı

- Tez-tez əllərimi yuyuram. Virusdan qorxmuram. Maskadan da istifadə etmirəm.

Mehriban Vəzir

Yazıçı

- Koronavirus həyatıma girmiş, əlbəttə. Davamlı bu mövzuda oxuyuram, dinləyirəm və danışıram. Lakin həyat tərzimdə elə bir dəyişiklik yoxdur, əllərimi əvvəlki kimi yuyuram, vitamini C-ni əvvəlki kimi atıram, xeyrə-şərə gedirəm. Fondların ayırdığı 100 milyard avrodan pay qapmaq üçün dövlətlərin yarışını izləyirəm. Çox qorxduğum məsələ: Türkiyə-Azərbaycan yollarının bağlanmasıdır. Çünki yarım o taydadır. Övladlarım ordadır.

Fikrət Qoca

Xalq şairi

- 85 yaşım var. Bu virusdan qorxacaq ən axırıncı adam mənəm. Koronavirusadan qorunmuram. Ölüm nə vaxt gəlsə o vaxtda dünyadan köçəcəm. Amma ehtiyatı əldən vermək olmaz, virusdan qorunmaq gərəklidir. Tədbirlərə gedirəm, insanlarla ünsiyyət saxlayıram.

Nəriman Həsənzadə

Xalq şairi

- Evdən çölə çıxmıram. Əllərimi vaxtaşırı yuyuram. Qorunmağa çalışıram virusdan.

Sabir Rüstəmxanlı

Xalq şairi

- Koronavirusdan hələ ki, qorunmuram. Tədbirlər almıram və qorxmuram...

Səfər Alışarlı

Yazıçı

- Adamların sıx olduğu yerlərə getməməyə çalışıram. Əllərimi tez-tez sabunla yuyuram, heç kimlə öpüşmürəm. Ümumiyyətlə bir qədər qapalı həyat tərzi keçirməyə çalışıram. Məni təəccübləndirən odur ki, bizim camaat virusla da Koroğlu tüfənglə davranan kimi davranır. Düşünürəm ki, Səhiyyə Nazirliyi dezinfeksiya tədbirləri ilə kifayətlənməməli, metro stansiyalarının qarşısında, mərkəzi meydanlarda kütləvi maarifləndirmə aksiyaları təşkil edib camaata virusdan qorunmağın elementar yollarını izah etməlidir. Virusun epidemiya yaratmağını gözləmək olmaz.

Sahilə İbrahimova

Yazıçı

- Hələ tam qorxmuram, amma tədbirlərimi alıram. İnsanların çox olduğu yerlərə getmirəm, öpüşüb, görüşmürəm, ünsiyyət zamanı daha çox ara məsafəsi saxlayıram, əllərimi tez-tez yuyuram, tez-tez maye qəbul edirəm, spirt və “pereksis”dən istifadə edirəm.

Rəşad Məcid

AYB-nin katibi, şair

- Bu virusa bir az ironik baxır, çox sakit yanaşıram. Hesab edirəm ki, bəzi KİV-lər, sosial şəbəkələr, bəzən də məqsədyönlü şəkildə qorxu və vahimə yaradırlar. Bildiyim qədər bu virus o qədər də qorxulu deyil. Və ona görə də mətbuatın qorxu və vahimə yaratmasının tərəfdarı deyiləm.

Aqşin Yenisey

Şair

- Gündəlik gigiyenik qaydalar bir az sərtləşib evdə. Bir də ehtiyac olmadıqca küçədə-bacada az gəzib-tozuruq. Koronavirusşünaslığımız da yaranmağa başlayıb artıq. Hətta başqalarına da ağıl veririk.

Könül Arif

Şair

- Məni cəmiyyətimizin qadınları adına daha ciddi bir “virus” narahat edir ki, bu da periodik bir virus deyil, bu - əzəli bir “virus”dur ki, qarşısı alınmasa öz-özünə ötüb keçən deyil. Kütləvi qadın qətlindən qorunmaq istiqamətində hansı addımlar ata biləcəyim haqda düşünürəm.

• Hər yer hasarlanıb, hər yerin "yiyəsi", "xozeyni" var - Yalçın İslamzadə
• Kinorejissor ana və 11 aylıq qızını öldürdü - Meyitlər parkda tapıldı
• "Sevdiyin qadının şəklini çək, paylaş!" - Cəlil Cavanşir