Elektron musiqi tarixinin ən mühüm simalarından, texno janrının qurucularından Xuan Atkins 64 yaşında dünyasını dəyişib.
Kulis.az xəbər verir ki, musiqiçi Meksiko şəhərində qaldığı hotel otağında huşsuz vəziyyətdə tapılıb və xəstəxanaya aparıldıqdan sonra vəfat edib.
Onun ölüm səbəbi barədə isə rəsmi təsdiqlənmiş ətraflı məlumat yoxdur.
1962-ci ildə Detroitdə doğulan Atkins elektron musiqinin formalaşmasında həlledici rol oynayıb. O, Derrik Mey və Kevin Saundersonla birlikdə “Belleville Three” adı ilə tanınan üçlüyün üzvü olub. Bu yaradıcılar Detroit texnosunun əsasını qoyan musiqiçilər sırasında göstərilir. Atkins “Cybotron” layihəsi və “Model 500” adı ilə də tanınıb.
Onun “Clear” və “No UFO’s” kimi kompozisiyaları elektron musiqinin inkişafına ciddi təsir göstərib. Atkinsin yaratdığı səs dili sonrakı illərdə texno, elektron rəqs musiqisi və klub mədəniyyətinin müxtəlif istiqamətlərində özünü göstərib. Musiqiçinin vəfatı elektron musiqi dünyasında böyük itki kimi qarşılanıb.
Ana səhifə
Reels
Yazarlar
Xəbərlər