Dünyaşöhrətli rejissor Martin Skorseze baş rolda Ancelina Colinin çəkilməsi planlaşdırılan "Kleopatra" layihəsinin niyə çəkilmədiyini açıqlayıb.
Kulis.az xəbər verir ki, "Variety" nəşrinə danışan rejissor filmin 2014-cü ildə Set Roqenin "Müsahibə" (The Interview) komediyası ilə əlaqədar "Sony" serverlərinə edilən səs-küylü kiberhücum üzündən ləğv edildiyini bildirib.
Kim Çen İnlə zarafat və ləğv edilən meqalayihə
Məlum olduğu kimi, "Müsahibə" komediyasında Şimali Koreya lideri Kim Çen İna qarşı sui-qəsd cəhdi səhnəsi yer alırdı. Buna etiraz olaraq hakerlər "Sony Pictures" şirkətinin serverlərini sındırmış və filmin nümayişindən imtina edilməsini tələb etmişdilər. Skorseze həmin xaos günlərini belə xatırlayır:
"Biz 'Kleopatra'nı çəkməyə hazırlaşırdıq. Sonra onlar Kim Çen İnlə zarafat etdilər və bu, "Columbia" studiyasında əsl qarmaqarışıqlıq yaratdı. Set Roqen, elədirmi? Məhz bu hadisə mənim filmimi də məhv etdi".
Rejissor vurğulayıb ki, ekran işi "həqiqətən də dəlicəsinə" və qeyri-adi alınmalı idi. Layihədə VII Kleopatra rolunu Ancelina Coli ifa etməyə hazırlaşırdı, ssenarini isə məşhur ssenarist Erik Rot qələmə almalı idi. Lakin kiberhücumun yaratdığı daxili böhran studiyanı bu nəhəng layihəni maliyyələşdirməkdən çəkindirdi.
Skorsezenin yeni hədəfi: Roma Papası ilə sənədli film
Qeyd edək ki, 2025-ci ilin may ayında Skorsezenin Roma Papası Fransiskin iştirakı ilə "Aldeas — Yeni tarix" (Aldeas — A New Story) adlı sənədli film üzərində işlədiyi açıqlanmışdı. Ekran işinə pontifikin kamera qarşısında verdiyi "sonuncu müsahibə"si də daxil ediləcək. Layihə 2013-cü ildə Roma Papası tərəfindən təsis edilən "Scholas Occurrentes" beynəlxalq qeyri-kommersiya təşkilatından bəhs edəcək. Qurumun əsas məqsədi təhsil, incəsənət və idman vasitəsilə dünyanın hər yerindən gəncləri bir yerə toplamaqdır.
Ana səhifə
Reels
Yazarlar
Xəbərlər