Avropa İttifaqının (Aİ) rəsmi jurnalı rusiyalı məşhur müğənni Polina Qaqarinanın ona qarşı tətbiq edilən sanksiyaların ləğvi tələbi ilə Avropa İttifaqı Şurasına qarşı qaldırdığı iddianın detallarını dərc edib.
Kulis.az xəbər verir ki, sənətçi adının sanksiya siyahısından çıxarılmasını istəyir və məhdudlaşdırıcı tədbirlərə etiraz etmək üçün beş əsas səbəbə istinad edir.
Jurnalda Aİ məhkəməsi tərəfindən mayın 25-də qeydə alınan iddia ilə bağlı xüsusi çıxarışlar yer alıb. Müğənni Şuranın 14 mart 2026-cı il tarixli qərarının ona aid hissəsinin ləğv edilməsini və məhkəmə xərclərinin qarşılanmasını tələb edir.
Sənətçinin sanksiyalara etiraz etdiyi 5 əsas səbəb bunlardır:
Qərarın hüquqi cəhətdən əsaslandırılmaması;
Halların qiymətləndirilməsindəki açıq yanlışlıq;
Sənətçinin sanksiya meyarlarına uyğun gəlməsini təsdiqləyən sübutların yetərsizliyi;
Mütənasiblik prinsipinin pozulması;
Effektiv məhkəmə müdafiəsi hüququnun təmin edilməməsi.
Bununla yanaşı, şikayətçi Avropa qanunvericiliyi tərəfindən zəmanət verilən ifadə və yaradıcılıq azadlığının kobud şəkildə pozulduğunu iddia edir. O, sanksiya siyahılarına daxil edilmə meyarlarının qanuniliyini şübhə altına alır və qərarların qəbulu zamanı prosedur tələblərinə əməl olunmadığını vurğulayır.
Qeyd edək ki, Qaqarinanın Avropa İttifaqı Şurasına qarşı iddiası barədə ilk xəbərlər mayın 27-də yayılmışdı. Lakin bu, müğənninin ilk şikayəti deyil — o, 2024-cü ildə də Avropa məhkəməsinə oxşar müraciət etmişdi.
Qaqarinanın özünün açıqlamasına görə, o, əslində, şəxsi sanksiyalara sakit yanaşardı, lakin əvvəllər mahnılarını sərbəst şəkildə yayımlaya bildiyi beynəlxalq musiqi platformalarının bloklanmasından və yaradıcılığının məhdudlaşdırılmasından son dərəcə narazıdır.
